វិមានក្រឹមឡាំង នៅ​ថ្ងៃចន្ទ (ទី២២ ខែមិថុនា ឆ្នាំ២០២៦) នេះ បានចោទប្រកាន់ប្រទេស​អ៊ុយក្រែនថា គំរាមកំហែងដល់អធិបតេយ្យភាពរបស់បេឡារុសដែល​ជា​សម្ព័ន្ធមិត្តជិតស្និទ្ធរបស់​រុស្ស៊ី បន្ទាប់ពីទីក្រុងគីវបានផ្តល់ពេល ១សប្តាហ៍ដល់ទីក្រុងមីនស្ក៍ ឲ្យ​ដកស្ថានីយ៍បញ្ជូនសញ្ញាដែលខ្លួនចាត់ទុក​ថា កំពុងត្រូវបានប្រើប្រាស់ ដើម្បីជួយ​បង្ហាញ​គោល​ដៅ សម្រាប់​ការវាយប្រហាររបស់រុស្ស៊ី។

ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃសុក្រថា មួយសប្តាហ៍គួរតែគ្រប់គ្រាន់ ដើម្បី​ឲ្យ​មេដឹកនាំបេឡារុស លោក Alexander Lukashenko ដកឧបករណ៍ចេញ ដែលលោកបាននិយាយថា កំពុងត្រូវបានប្រើប្រាស់ដោយរុស្ស៊ី នៅ​ក្នុង​វាយប្រហាររបស់ខ្លួន លើអ៊ុយក្រែន ដោយបន្ថែមការគំរាមកំហែងពី​ការ​មាន​វិធានការ​របស់អ៊ុយក្រែន ប្រសិនបើលោក Lukashenko មិនធ្វើដូច្នេះ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ប្រធានាធិបតីរុស្ស៊ី លោក Vladimir Putin និងប្រធានាធិបតីបេឡារុស លោក Lukashenko ត្រូវបានគេរំពឹងថា នឹងពិភាក្សាអំពីការកត់សម្គាល់របស់លោក Zelenskiy «នាពេលអនាគតដ៏ខ្លីខាងមុខនេះ»។

លោក Peskov បានប្រាប់អ្នកសារព័ត៌មានថា៖ «ពាក់​ព័ន្ធ​នឹង​ការគំរាមកំហែង ​ ពិតណាស់​ វាគឺ​ជាការឈ្លានពានទាំងស្រុង ដែល​មាន​ដូចជាការជ្រៀតជ្រែកក្នុងកិច្ចការផ្ទៃក្នុងរបស់ប្រទេសមួយផ្សេងទៀត និងការរំលោភលើអធិបតេយ្យភាពរបស់ប្រទេសមួយផ្សេងទៀត។ ប៉ុន្តែយើងមិនមានការសង្ស័យអ្វីទាំងអស់ថាថ្នាក់ដឹកនាំបេឡារុស និងបេឡារុសខ្លួនឯង មានសមត្ថភាពការពារអធិបតេយ្យភាពរបស់ពួកគេ»។

កងកម្លាំងរុស្ស៊ីបានប្រើប្រាស់ទឹកដីបេឡារុស ដើម្បីចូលលុក​លុយ​ប្រទេសអ៊ុយក្រែន ក្នុងខែកុម្ភៈ ឆ្នាំ​២០២២ ប៉ុន្តែទីក្រុងមីនស្ក៍ ដែលជាកន្លែងមានអាវុធនុយក្លេអ៊ែរយុទ្ធសាស្ត្ររបស់រុស្ស៊ី មិនទាន់បានបញ្ជូនកងទ័ពរបស់ខ្លួននៅឡើយទេ ហើយបានបញ្ជាក់​ថា ខ្លួនមិនមានគម្រោងចូលរួមសង្គ្រាមនោះទេ​៕