រដ្ឋមន្ត្រីការបរទេសចិន លោក Wang Yi នៅ​ថ្ងៃចន្ទ (ទី២២ ខែមិថុនា ឆ្នាំ២០២៦) នេះ បានជួបជាមួយលេខារង​នៃ​ក្រុមប្រឹក្សាសន្តិសុខជាតិជាន់ខ្ពស់អ៊ីរ៉ង់ លោក Ghadir Nezami នៅក្រៅកិច្ចប្រជុំប្លុក​ BRICS នៅទីក្រុងញូវដេលីរបស់​​ឥណ្ឌា ក្រោយ​មាន​កិច្ចពិភាក្សារបស់ទីក្រុងតេអេរ៉ង់ជាមួយសហរដ្ឋអាមេរិក នៅប្រទេសស្វីស។

យោងតាមសេចក្តីថ្លែងការណ៍ពីស្ថានទូតអ៊ីរ៉ង់ ប្រចាំនៅ​ប្រទេសឥណ្ឌា ភាគី​​ទាំង២ បានពិភាក្សាអំពីការអភិវឌ្ឍក្នុងតំបន់ កិច្ចសហប្រតិបត្តិការទ្វេភាគី និងការអនុវត្តកិច្ចព្រមព្រៀងសន្តិភាព។ ហើយ​បើយោងតាមសេចក្តីថ្លែងការណ៍ពីក្រសួងការបរទេសចិន បានឲ្យ​ដឹងថា លោក Wang បានលើក​ឡើង​ថា ចំណុចទាំង ១៤ នៃកិច្ចព្រមព្រៀងនេះ បង្ហាញពី «ស្មារតីនៃសមភាព ប្រកាន់ខ្ជាប់នូវគោលបំណងនៃធម្មនុញ្ញអង្គការសហប្រជាជាតិ និងស្របតាមបទដ្ឋាននៃទំនាក់ទំនងអន្តរជាតិ»។

តាម​រយៈសេចក្ដី​ថ្លែងការណ៍នោះ លោក Wang បានសង្កត់ធ្ងន់ថា ការថែរក្សា និងការអនុវត្តអនុស្សរណៈនៃការយោគយល់គ្នា (MOU) នឹងជួយពង្រឹងបទឈប់បាញ់ «ដែលទទួល​បាន​ដោយលំបាក» បើកឱកាសថ្មី សម្រាប់ទំនាក់ទំនងអ៊ីរ៉ង់-សហរដ្ឋអាមេរិក និងរួមចំណែកដល់ការស្តារសន្តិភាព នៅតំបន់​មជ្ឈិមបូព៌ា។

លោកបានបន្ថែមថា «ក្នុងនាមជាដៃគូយុទ្ធសាស្ត្រគ្រប់ជ្រុង​ជ្រោយ​របស់អ៊ីរ៉ង់ ប្រទេសចិនតែងតែរក្សាជំហរដ៏យុត្តិធម៌ និងគោលបំណង គាំទ្រកិច្ចប្រឹងប្រែងទាំងអស់ដែលនាំទៅរកសន្តិភាព គាំទ្រអ៊ីរ៉ង់ការពារអធិបតេយ្យភាព សន្តិសុខ និងសេចក្តីថ្លៃថ្នូរជាតិរបស់ខ្លួន» ព្រមទាំងបានបង្ហាញ​ការគាំទ្រ ចំពោះកិច្ចប្រឹងប្រែងរបស់ទីក្រុងតេអេរ៉ង់ក្នុងការកែលម្អទំនាក់ទំនងជាមួយបណ្តាប្រទេសឈូងសមុទ្រ និងរដ្ឋ ក្នុងតំបន់ដទៃទៀត។

ចំណែក​លោក Nezami បានសម្តែងការកោតសរសើរ ចំពោះការគាំទ្រផ្នែកនយោបាយរបស់ចិន និងបានសង្កត់ធ្ងន់លើសារៈសំខាន់នៃការពង្រឹងភាពជាដៃគូយុទ្ធសាស្ត្រ រវាងទីក្រុងតេអេរ៉ង់ និងប៉េកាំង ក៏ដូចជាការត្រៀមខ្លួនរបស់អ៊ីរ៉ង់ ក្នុងការឆ្លើយតបទៅនឹងការគំរាមកំហែងដែលអាចកើតមានណាមួយ។ នេះបើយោងតាមការ​ឲ្យដឹង​បន្ថែម​​ពី​ស្ថានទូតអ៊ីរ៉ង់​៕