អភិបាលតំបន់គ្រីមៀលោក Sergei Aksyonov និយាយថា តំបន់កាន់កាប់ដោយរុស្ស៊ីមួយនេះ ដែលជាគោលដៅទេសចរណ៍ដ៏ទាក់ទាញ បានផ្អាកការបោះជំរំរដូវក្តៅរបស់ក្មេងៗ ហើយនិងសកម្មភាពកម្សាន្តផ្សេងៗរបស់ភ្ញៀវទេសចររហូតដល់ថ្ងៃទី ១ ខែកញ្ញា ស្របពេលដែលឧបទ្វីបរបស់លោកជួបកង្វះខាតប្រេង ដោយសារការវាយប្រហាររបស់អ៊ុយក្រែនលើផ្លូវផ្គត់ផ្គង់របស់ពួកគេ ។

លោក Aksyonov និយាយនៅថ្ងៃចន្ទនេះថា ការបិទជំរំរបស់ក្មេងៗ គឺជាផលប្រយោជន៍សន្តិសុខសាធារណៈ ។

គួរឲ្យដឹងថា បណ្ដាស្ថានីយប្រេងឥន្ធនៈនៅគ្រីមៀ ត្រូវបានណែនាំគិតត្រឹមថ្ងៃទី២១ ខែមិថុនា ឲ្យផ្អាកទាំងស្រុងការលក់ប្រេងឥន្ធនៈដល់ជនស៊ីវិល ខណៈអ៊ុយក្រែនបង្កើនការវាយប្រហារដោយដ្រូនរយៈចម្ងាយមធ្យមលើហេដ្ឋារចនាសម្ព័ន្ធថាមពលនៅទូទាំងឧបទ្វីបមួយនេះ ។

ការវាយប្រហារដោយយានដ្រូនលើរោងចក្រថាមពលរបស់រុស្ស៊ីបានក្លាយជាចំណុចស្នូលនៃយុទ្ធសាស្ត្រសង្គ្រាមរបស់ទីក្រុងគីវ ដែលមានគោលបំណងបំផ្លាញសមត្ថភាពរបស់ទីក្រុងមូស្គូក្នុងការប្រយុទ្ធ និងនាំយកការពិតនៃសង្គ្រាមបង្ហាញប្រាប់ដល់ជនស៊ីវិលរុស្ស៊ី ។

រលកនៃការវាយប្រហារដោយយានដ្រូនរយៈចម្ងាយមធ្យមរបស់អ៊ុយក្រែន បានកំណត់គោលដៅតំបន់គ្រីមៀ ក្នុងរយៈពេលប៉ុន្មានសប្តាហ៍ថ្មីៗនេះ។

លោក Mykhailo Fedorov គឺជារដ្ឋមន្ត្រីក្រសួងការពារជាតិអ៊ុយក្រែន បាននិយាយកាលពីថ្ងៃទី១៧ ខែមិថុនាថា ទីក្រុងគីវមានគោលបំណងប្រែក្លាយឧបទ្វីបនេះទៅជាកោះមួយ ដោយវាយប្រហារខ្សែចង្វាក់ផ្គត់ផ្គង់របស់រុស្ស៊ី ដើម្បីកាត់ផ្ដាច់តំបន់មួយនេះចេញពីដីគោករបស់រុស្ស៊ី ៕