ភ្នំពេញ៖ ដើម្បីធានានិរន្តរភាពការរស់នៅធម្មតាជាមួយជំងឺកូវីដ-១៩ ខណៈរាជរដ្ឋាភិបាលលើកលែងកាត្វកិច្ច ពាក់ម៉ាស់នៅទីសាធារណៈ ការបើកសេដ្ឋកិច្ចធម្មតា ក្នុងពេលមានវត្តមានជំងឺកូវីដ-១៩ មន្រ្តីជំនាញនៃក្រសួងសុខាភិបាល បានអំពាវនាវដល់ប្រជាពលរដ្ឋ ត្រូវយកចិត្តទុកដាក់ចំនួន៣ចំណុច។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការ ចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស កាលពីម្សិលមិញ បានប្រាប់BTVឱ្យដឹងថា បច្ចុប្បន្ន ការធ្វើតេស្តតាមម៉ាស៊ីនPCR រកមេរោគកូវីដ-១៩ មានការ​ថយចុះគួរសម្គាល់ ​បន្ទាប់ពីអត្រាចាក់ វ៉ាក់សាំងកូវីដជូនពលរដ្ឋមានចំនួនខ្ពស់។

លើសពីនេះ លោកជំទាវវេជ្ជបណ្ឌិត បានអំពាវនាវ៣ចំណុចដល់ប្រជាពលរដ្ឋត្រូវយកចិត្តទុកដាក់ ដើម្បី​ធានានិរន្តរ៍ភាព ការរស់នៅធម្មតាជាមួយជំងឺកូវីដ-១៩ ខណៈរាជរដ្ឋាភិបាលលើកលែងកាត្វ​កិច្ចពាក់ម៉ាស់នៅទីសាធារណៈទូទាំងប្រទេស ​និងការបើកសេដ្ឋកិច្ចធម្មតាជាមួយវត្តមានជំងឺកូវីដ។ ៣ចំណុច ដែលលោកជំទាវ បានអំពាវនាវនោះ រួមមាន៖ ទី១. ការចាក់វ៉ាក់សាំងឱ្យគ្រប់ចំនួនដូស​ទៅ​តាមការណែនាំ របស់រាជរដ្ឋាភិបាល ទី២. ត្រូវចេះវាយតម្លៃដោយខ្លួនឯង ​កន្លែងណាត្រូវពាក់ម៉ាស់ ឬមិនត្រូវពាក់ម៉ាស់ និង ទី៣. ការចេះភ្ញាក់រលឹកដោយខ្លួនឯង ​ពេលសង្ស័យមានជំងឺកូវីដ ត្រូវធ្វើ​តេស្តរហ័ស ឬមានតម្រូវការចាំបាច់​ ត្រូវធ្វើតេស្តតាមម៉ាស៊ីនPCR។

ការចាក់វ៉ាក់សាំងកូវីដ-១៩ ស្រោចលើប្រជាពលរដ្ឋ ត្រូវបានរាជរដ្ឋាភិបាលកម្ពុជា​ ចាត់ទុក​ជា​យុទ្ធសាស្រ្ត​ចម្បងមួយ​ ដើម្បីទប់ស្កាត់ការរីករាលដាលជំងឺកូវីដ-១៩ ខណៈបច្ចុប្បន្នប្រទេសកម្ពុជា​បើកដំណើរសេដ្ឋកិច្ចធម្មតា ​ក្នុងពេលមានវត្តមានជំងឺកូវីដ។

គិតត្រឹមថ្ងៃនេះ ប្រទេសកម្ពុជារកវ៉ាក់សាំងកូវីដបានជាង៥០លានដូស ​ទាំងការបញ្ជាទិញ ​ជំនួយ តាម​រយៈយន្តការកូវ៉ាក់ ​និងបណ្តាប្រទេសផ្សេងៗមួយចំនួនទៀត សម្រាប់ប្រើប្រាស់ក្នុងយុទ្ធនាការ​ចាក់វ៉ាក់ ​សាំងបង្ការជំងឺកូវីដ-១៩ ​ជូនពលរដ្ឋអាយុពី៣ឆ្នាំឡើង ​ចាប់ពីដូសទី១ ដល់ទី៤៕ អត្ថបទ៖ ទូច សោភ័ណ