កណ្ដាល៖ នៅថ្ងៃទី២៧ ខែមេសានេះ ក្រុមពេទ្យនៅតាមមណ្ឌលសុខភាពនានា នៅទូទាំងខេត្តកណ្តាល បានចាប់ផ្តើមបើកយុទ្ធនាការចុះចាក់វ៉ាក់សាំងការពារកូវីដ១៩ នៅតាមភូមិ និងតាមខ្នងផ្ទះប្រជាពលរដ្ឋ ដើម្បីពង្រឹងភាពស៊ាំ និងកាត់ផ្តាច់ខ្សែចំលងមេរោគកូវីដ១៩ នៅក្នុងសហគមន៍។

បើតាមលោក ថន ប៊ុនធឿន ប្រធានមណ្ឌលសុខភាពព្រែកគយ ឃុំព្រែកគយ ស្រុកស្អាង​ខេត្តកណ្តាល បានថ្លែងថា ​តាមការចុះចាក់វ៉ាក់សាំងការពារកូវី១៩ ​នៅតាមបណ្តាភូមិ និងតាម​ខ្នងផ្ទះ ប្រជាពលរដ្ឋ នៅពេលនេះ គឺ ជាការចុះបោសសំអាតពលរដ្ឋដែលមិនទាន់ទទួល​បានការចាក់វ៉ាក់សាំងដូសទី១ នៅតាមភូមិ ការចុះផ្តល់សេវាចាក់វ៉ាក់សាំងតាមភូមិនេះ យើង​ក៏ទទួល​បានពលរដ្ឋជាច្រើនបានមកចាក់វ៉ាក់សាំងដូសទី៣ ​និងដូសទី៤ផងដែរ។

បើតាមមេភូមិ និងពលរដ្ឋនៅភូមិទួលសុភី បានថ្លែងថា យើងមានការថ្លែងអំណរគុណក្រុមគ្រូពេទ្យ​ជាខ្លាំង ដែលបាននាំគ្នាចុះចាក់វ៉ាក់សំាងនៅតាមភូមិ​ និងខ្នងផ្ទះនេះ ខណៈពលរដ្ឋមួយចំនួន ជាប់​រវល់ការងារ ខ្លះកំពុងពរពោះ​ និងខ្លះមានជំងឺផ្សេងៗមិនអាច​ចាក់បាននាពេលកន្លងមក។

បើតាមវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល បានថ្លែងថា នៅពេលនេះ មន្ទីរពេទ្យបាននិងកំពុងជម្រុញអោយគ្រប់មណ្ឌលសុខភាព ​និងមន្ទីរពេទ្យបង្អែកទាំងអស់ ចុះ​សហការ​ជាមួយអាជ្ញាធរមូលដ្ឋានភូមិឃុំសង្កាត់ ចុះធ្វើការសំរង់ទិន្នន័យតាមភូមិស្វែងរកពលរដ្ឋ​មិនទាន់​ទទួលបាន​ការចាក់វ៉ាក់សាំង និងចុះចាក់ដូសវ៉ាក់សាំងដូសជម្រុញនានាជូន​ពលរដ្ឋ​អោយ​បានគ្រប់គ្នា ដើម្បីពង្រឹងភាពស៊ាំក្នុងសហគមន៍ ​ខណៈបច្ចុប្បន្ននៅទូទាំង​ខេត្តកណ្តាល គឺមាន​ពលរដ្ឋស្ទើរមិនដល់១% ទេ​ គឺមិនទាន់ទទួលបានចាក់វ៉ាក់សាំងការពារកូវីដ១៩នេះ៕ អត្ថបទ ស៊ុម សុខជា