សហរដ្ឋអាមេរិកបាន​ផ្អាកទណ្ឌកម្មលើអ៊ីរ៉ង់រយៈពេល ៦០​ថ្ងៃ គិតចាប់ពីថ្ងៃចន្ទតទៅ​ បន្ទាប់ពីបញ្ចប់​ការចរចាលើកដំបូងក្រោមកិច្ចព្រមព្រៀងសន្តិភាពដែលទើបកើតឡើង តែ​ប្រធានាធិបតីអាមេរិក លោក Donald Trump បានបញ្ជាក់​ថា លោកនឹងធ្វើអ្វីដែលត្រូវធ្វើ ប្រសិនបើអ៊ីរ៉ង់មិនប្រកាន់ខ្ជាប់នូវកិច្ចព្រមព្រៀងរបស់ខ្លួនទេ​នោះ​។

អនុប្រធានាធិបតីអាមេរិក លោក JD Vance បាននិយាយថា ការចរចាជាមួយមន្ត្រីអ៊ីរ៉ង់ នៅប្រទេសស្វីស បានបង្កើត​នូវ​គ្រឹះដ៏ល្អប្រសើរ សម្រាប់កិច្ចព្រមព្រៀងសន្តិភាពចុងក្រោយ ទោះបីជាអ៊ីរ៉ង់បានបដិសេធថា ខ្លួនមិន​បានចាប់ផ្តើមការពិភាក្សា ស្ដី​ពី​កម្មវិធីនុយក្លេអ៊ែររបស់ខ្លួនក៏ដោយ។

អន្តរការី គឺប៉ាគីស្ថាន និងកាតា បានឲ្យ​ដឹង​ថា ភាគីទាំង២ ដោយព្យាយាមអភិវឌ្ឍកិច្ចព្រមព្រៀងបណ្តោះអាសន្នដែលពួកគេបានចុះហត្ថលេខាកាលពីសប្តាហ៍មុន បានព្រមព្រៀងគ្នាលើផែនទីបង្ហាញផ្លូវឆ្ពោះទៅរកកិច្ចព្រមព្រៀងអចិន្ត្រៃយ៍ ក្នុងរយៈពេល ៦០​ថ្ងៃ អំឡុង​ការចរចា នៅឯ​រមណីយដ្ឋានជួរភ្នំ ក្នុង​ទីក្រុង​ Buergenstock របស់ប្រទេសស្វីស។

ក្នុង​វិធានការ​ដំបូង ក្នុងចំណោមវិធានការ​ជាច្រើនដែលបានគ្រោងទុក ក្រោមកិច្ចព្រមព្រៀងនេះ ដើម្បីផ្តល់ជំនួយសេដ្ឋកិច្ចដល់អ៊ីរ៉ង់ ក្រសួងរតនាគារសហរដ្ឋអាមេរិក បានប្រកាសពីការលើកលែងទណ្ឌកម្ម រហូតដល់ថ្ងៃទី២១ ខែសីហា ដោយអនុញ្ញាតឲ្យ​ទីក្រុងតេអេរ៉ង់លក់ប្រេង និងផលិតផលពាក់ព័ន្ធ និងទទួលបានការទូទាត់ សម្រាប់ការ​លក់​ដូរ​ទាំង​នោះ​។

កាលពីថ្ងៃចន្ទ (ទី២២ ខែមិថុនា ឆ្នាំ២០២៦) លោក Trump បានលើក​ឡើង​តាមរយៈ​ការបង្ហោះលើបណ្ដាញសង្គម Truth Social ថា អ៊ីរ៉ង់នឹងយល់ព្រមឲ្យ​មានការត្រួតពិនិត្យអាវុធ ដើម្បីធានាបាននូវ «ភាពស្មោះត្រង់ផ្នែក​នុយក្លេអ៊ែរ«។ ហើយ​បន្ទាប់មក​ លោក Trump បានប្រាប់អ្នកសារព័ត៌មានថា «ប្រសិនបើអ៊ីរ៉ង់មិនគោរពតាមកិច្ចព្រមព្រៀងរបស់ពួកគេ ឬប្រសិនបើពួកគេមិនមានអាកប្បកិរិយាល្អទេនោះ​ ខ្ញុំនឹងធ្វើអ្វីដែលខ្ញុំត្រូវធ្វើ»៕