ប្រព័ន្ធផ្សព្វផ្សាយសាធារណៈរបស់អ៊ីស្រាអែល KAN បាន​រាយការណ៍​កាលពីថ្ងៃចន្ទ (ទី២២ ខែមិថុនា ឆ្នាំ២០២៦) ថា ប្រទេស​អ៊ីស្រាអែលកំពុងគិតគូរពីលទ្ធភាពដែល​អាចមាន​ការទាមទារនាពេលអនាគត​របស់សហរដ្ឋអាមេរិក ដើម្បីឲ្យ​​ដកកងទ័ពរបស់​អ៊ីស្រាអែលបន្តិចម្តងៗចេញពីតំបន់នានា នៅភាគខាងត្បូងនៃ​ប្រទេសលីបង់​។

ប្រព័ន្ធផ្សព្វផ្សាយ KAN បានឲ្យ​ដឹង​ថា កិច្ចចរចាជុំថ្មី រវាងអ៊ីស្រាអែល និងលីបង់ ត្រូវបានកំណត់ចាប់ផ្តើមនៅថ្ងៃអង្គារនេះ ដើម្បីពិភាក្សាអំពីការរៀបចំដំបូង សម្រាប់ការដកកង​ទ័ពរបស់​អ៊ីស្រាអែលចេញពីភាគខាងត្បូងលីបង់ ដែលជាផ្នែកមួយនៃកម្មវិធីសាកល្បង សម្រាប់កងទ័ពលីបង់។

ប្រព័ន្ធផ្សព្វផ្សាយនេះបានឲ្យ​ដឹង​ទៀត​ថា កិច្ចចរចានេះត្រូវបានគេរំពឹងថា នឹងធ្វើឡើងក្រោមការសម្របសម្រួលរបស់សហរដ្ឋអាមេរិក និងដោយមានការចូលរួមពីឯកអគ្គរដ្ឋទូតអ៊ីស្រាអែល និងលីបង់ រួមជាមួយឧត្តមសេនីយ៍ត្រីអ៊ីស្រាអែល ៣រូប។

ជាមួយ​គ្នានេះ ប្រព័ន្ធផ្សព្វផ្សាយ​នេះ​ក៏បានរាយការណ៍ផងដែរថា កងកម្លាំងអ៊ីស្រាអែលបានចាប់ផ្តើម​ចល័ត​ប្តូរទីតាំង និងរៀបចំកងទ័ពឡើងវិញនៅលើដីក្នុងរយៈពេល ២៤ម៉ោងកន្លងមក ខណៈពេលដែលកំពុងរង់ចាំការសម្រេចពីថ្នាក់ដឹកនាំនយោបាយ។

KAN បានដកស្រង់ប្រភពពី​អ៊ីស្រាអែលដែលបាន​និយាយ​ដោយ​មិនបញ្ចេញឈ្មោះ ដែល​បាន​បញ្ជាក់​ថា អ៊ីស្រាអែលកំពុងគិតគូរពីលទ្ធភាពដែលកងទ័ពអ៊ីស្រាអែលអាចត្រូវបានស្នើដោយការសម្រេចរបស់អាមេរិកឲ្យ​ដកចេញពីតំបន់មួយចំនួន នៅក្នុងតំបន់សន្តិសុខ ដែលអនុញ្ញាតឲ្យ​កងទ័ពលីបង់ត្រឡប់មកវិញ ជាវិធានការកសាងទំនុកចិត្ត៕