យើងមានព័ត៌មានជាច្រើនពីការឆ្លើយតបរបស់ទេសាភិបាលធនាគារកណ្តាលអ៊ីរ៉ង់ លោក Abdolnaser Hemmati ចំពោះការអះអាងរបស់លោក Trump ថា មូលនិធិអ៊ីរ៉ង់ដែលត្រូវបានបញ្ចេញនឹងត្រូវបានប្រើប្រាស់ដើម្បីទិញផលិតផលរបស់សហរដ្ឋអាមេរិក។

លោក Hemmati បានប្រាប់ទីភ្នាក់ងារសារព័ត៌មាន Tasnim ថា អ៊ីរ៉ង់ «មិនជាប់កាតព្វកិច្ចត្រូវទិញ» ផលិតផលកសិកម្មពីសហរដ្ឋអាមេរិកទេ។ លោកនិយាយថា កិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់លើបញ្ហានេះចែងថា ទឹកប្រាក់៦ពាន់លានដុល្លារដំបូងអាចត្រូវបានប្រើប្រាស់ដើម្បីទិញ «ទំនិញជាមូលដ្ឋាន និងឱសថ»។

ប៉ុន្តែ «ប្រសិនបើតម្លៃ និងគុណភាពនៃទំនិញនាំចូលពីសហរដ្ឋអាមេរិក សមរម្យជាងបើប្រៀបធៀបទៅនឹងប្រទេសដទៃ នោះយើងពុំមានការជំទាស់ក្នុងការទិញពីប្រទេសនេះឡើយ»។ ប្រាក់មូលនិធិចំនួន៦ពាន់លានដុល្លារទៀតដែលនៅសល់ «នឹងមិនចាំបាច់ចំណាយលើទំនិញជាមូលដ្ឋានទេ ប៉ុន្តែអ៊ីរ៉ង់ ក៏អាចទិញទំនិញផ្សេងទៀតដែលមិនជាប់ទណ្ឌកម្ម»។