ប្រជាជននៅក្នុងប្រទេសអង់គ្លេស បានឈានចូលដល់ខួប១០ឆ្នាំ ចាប់តាំងពីពួកគេបានបោះឆ្នោតចាកចេញពីសហភាពអឺរ៉ុប។ ការស្ទង់មតិថ្មីមួយបង្ហាញថា ប្រជាជនជិត៦០ភាគរយ បច្ចុប្បន្នជឿថា ប្រទេសនេះបានធ្វើការជ្រើសរើសខុស។ ប្រជាជនអង់គ្លេស បានបោះឆ្នោតនៅក្នុងការធ្វើប្រជាមតិជាប្រវត្តិសាស្ត្រមួយនៅថ្ងៃទី២៣ ខែមិថុនា ឆ្នាំ២០១៦ ហើយបន្ទាប់ពីការចរចាដ៏លំបាក ប្រទេសនេះបានចាកចេញពីសហភាពអឺរ៉ុបនៅក្នុងខែមករា ឆ្នាំ២០២០។

ទោះជាយ៉ាងណា អ្នករិះគន់និយាយថាការចាកចេញរបស់អង់គ្លេសពីសហភាពអឺរ៉ុប(Brexit) មានផលវិបាកសេដ្ឋកិច្ចអវិជ្ជមានសម្រាប់ចក្រភពអង់គ្លេស ជាពិសេសចាប់តាំងពីសហភាពអឺរ៉ុបធ្លាប់ជាដៃគូពាណិជ្ជកម្មធំបំផុតរបស់ខ្លួន។ ការអំពាវនាវឱ្យចក្រភពអង់គ្លេសចូលរួមក្នុងប្លុកនេះជាថ្មី កំពុងកើនឡើង។ ប្រជាជនបានប្រមូលផ្តុំគ្នានៅទីក្រុងឡុងដ៍ភាគកណ្តាលកាលពីថ្ងៃសៅរ៍សប្តាហ៍មុន ជាអ្វីដែលត្រូវបានគេចាត់ទុកថាជា «ការហែក្បួនដើម្បីចូលរួមជាថ្មី»។

ក្រុមហ៊ុនស្រាវជ្រាវ YouGov និយាយថា ការស្ទង់មតិរបស់ខ្លួនដែលបានធ្វើឡើងកាលពីដើមខែមិថុនាបានរកឃើញថា មានត្រឹមតែ៣០ភាគរយប៉ុណ្ណោះនៃប្រជាជនអង់គ្លេសជឿថា ចក្រភពអង់គ្លេសត្រឹមត្រូវក្នុងការបោះឆ្នោតចាកចេញពីសហភាពអឺរ៉ុប(Brexit) ខណៈ៥៧ភាគរយនៃអ្នកឆ្លើយតបនិយាយថា ការសម្រេចចិត្តគឺជាកំហុស។ រដ្ឋាភិបាលគណបក្សការងារបច្ចុប្បន្ននិយាយថា ខ្លួនពុំមានផែនការចូលរួមក្នុងសហភាពអឺរ៉ុបជាថ្មីឡើយ។ ប៉ុន្តែខ្លួនបានព្រមព្រៀងជាមួយប្លុកនេះដើម្បីចរចាធ្វើឲ្យនីតិវិធីពាណិជ្ជកម្មសម្រាប់ផលិតផលកសិកម្មមានភាពសាមញ្ញ ជាផ្នែកមួយនៃកិច្ចខិតខំប្រឹងប្រែងដើម្បីជំរុញកំណើនសេដ្ឋកិច្ចដោយលុបបំបាត់របាំងទីផ្សារ។