ភាពតានតឹងរវាងសហរដ្ឋអាមេរិក និងចិន ជុំវិញ​ការប្រើប្រាស់បច្ចេកវិទ្យាពាណិជ្ជកម្ម សម្រាប់គោលបំណងយោធា បានផ្ទុះឡើងជាថ្មី ដោយទីក្រុងប៉េកាំងបានដាក់ចេញនូវការគ្រប់គ្រងការនាំចេញ ចំពោះ​ក្រុមហ៊ុនអាមេរិកចំនួន ១០ ជាអ្វីដែលអ្នកវិភាគមើលឃើញថា ជាការឆ្លើយតបដែលបានក្រិតតាមខ្នាតចំពោះការពង្រីកការ​ចុះ​ឈ្មោះ​ក្នុង​បញ្ជីខ្មៅដោយ​មន្ទីរបញ្ចកោណរបស់ទីក្រុងវ៉ាស៊ីនតោន ដែលផ្តោតលើក្រុមហ៊ុនចិន និងក្រុមហ៊ុនបុត្រសម្ព័ន្ធរបស់ពួកគេ។

បើទោះ​បី​ជា​ចំណាត់ការនេះត្រូវបានគេមើលឃើញថា ជានិមិត្តរូបភាគដោយ​ភាគច្រើន ក៏​អ្នកសង្កេតការណ៍ លើក​ឡើង​ថា វាគឺ​គួរឲ្យ​កត់សម្គាល់ ព្រោះវាផ្តោតលើក្រុមហ៊ុនដែលជាចំណុចកណ្តាលនៃកិច្ចប្រឹងប្រែងរបស់សហរដ្ឋអាមេរិក ក្នុងការកសាងខ្សែច្រវាក់​ផ្គត់ផ្គង់រ៉ែកម្រឯករាជ្យ បន្ថែមពីលើក្រុមហ៊ុននៅក្នុងវិស័យការពារជាតិ និងអាកាសចរណ៍ ដោយ​បាន​បញ្ជាក់អំពី​ថា តើ​រ៉ែសំខាន់ៗនៅតែជាចំណុចសម្ពាធជាយុទ្ធសាស្ត្រយ៉ាង​ដូចម្ដេច នៅក្នុងការប្រកួតប្រជែងបច្ចេកវិទ្យា និងសន្តិសុខដ៏ទូលំទូលាយ រវាងសហរដ្ឋអាមេរិក និងចិន។

អ្នកនាំពាក្យក្រសួងពាណិជ្ជកម្មចិន បាននិយាយកាល​ពី​ថ្ងៃចន្ទ (ទី២២ ខែមិថុនា ឆ្នាំ២០២៦) ថា វិធានការទាំងនេះ មានបំណងការពារផលប្រយោជន៍ជាតិ និងឆ្លើយតបដោយផ្ទាល់ចំពោះការបន្ថែមអង្គភាពចិនរាប់សិប រួមទាំងក្រុមហ៊ុនបច្ចេកវិទ្យាយក្ស Alibaba និង Baidu ទៅក្នុងបញ្ជីដែលទីក្រុងវ៉ាស៊ីនតោនចចាត់ទុក​ថា បាន​គាំទ្រយោធារបស់ប្រទេសចិន។

លោក Chen Bo អ្នកស្រាវជ្រាវជាន់ខ្ពស់នៅវិទ្យាស្ថានអាស៊ីបូព៌ានៃសាកលវិទ្យាល័យជាតិសិង្ហបុរី បាននិយាយថា ក្រុមហ៊ុនអាមេរិកដែលត្រូវបានដាក់ទណ្ឌកម្ម មានការពឹងផ្អែកមាន​កម្រិត​លើប្រទេសចិន ប៉ុន្តែចំនាត់ការ​នេះ​ បង្ហាញថា ទីក្រុងប៉េកាំង ដឹងយ៉ាងច្បាស់ អំពីកន្លែងដែលផ្នែកសំខាន់ៗនៃខ្សែច្រវាក់​ផ្គត់ផ្គង់កំពុងលេចឡើង​របស់សហរដ្ឋអាមេរិក ស្ថិតនៅទីណា៕