យោងតាមសេចក្តីថ្លែងការណ៍ផ្លូវការមួយ បាន​ឲ្យ​ដឹង​ថា អំឡុងកិច្ចប្រជុំ កាលពី​ថ្ងៃចន្ទ (ទី២២ ខែមិថុនា ឆ្នាំ២០២៦) មន្ត្រីសន្តិសុខជាន់​ខ្ពស់​ឥណ្ឌា និងចិន បានកត់សម្គាល់ពី «ការធ្វើឲ្យ​មាន​ប្រក្រតីភាព​បន្តិចម្តង​ៗ» ក្នុងទំនាក់ទំនងនៃ​ប្រទេស​ទាំង២។

ទីប្រឹក្សាសន្តិសុខជាតិឥណ្ឌា លោក Ajit Doval បានជួបជាមួយរដ្ឋមន្ត្រីការបរទេសចិន លោក Wang Yi នៅក្រៅកិច្ចប្រជុំនៃប្លុក BRICS ដែលរួមមានប្រេស៊ីល រុស្ស៊ី អាហ្វ្រិកខាងត្បូង និងប្រទេសដទៃទៀត ដែលបានចាប់ផ្តើមកាល​ពី​ថ្ងៃចន្ទ នៅទីក្រុងញូវដេលីរបស់​ឥណ្ឌា។

លោក Randhir Jaiswal អ្នកនាំពាក្យក្រសួងការបរទេសឥណ្ឌា បានសរសេរនៅលើបណ្ដាញសង្គម X ថា «ភាគីទាំង២ បានពិនិត្យឡើងវិញនូវការវិវឌ្ឍថ្មីៗនៃទំនាក់ទំនងទ្វេភាគី និងបានកត់សម្គាល់ពីវឌ្ឍនភាពឆ្ពោះទៅរកការធ្វើឲ្យ​មាន​ប្រក្រតីភាព​បន្តិចម្តងៗ»។

 លោក Jaiswal បានបន្តថា ​លោក Doval «បានគូសបញ្ជាក់ថា ទំនាក់ទំនងទ្វេភាគីដែលមានស្ថិរភាព អាចព្យាករណ៍បាន និងប្រកប​ដោយ​ភាព​ស្ថាបនា រួមចំណែកដល់ការកសាងទំនុកចិត្ត និងការយោគយល់គ្នាកាន់តែប្រសើរឡើងរវាងភាគីទាំង២»។ លោកបានបន្ថែមថា «ការពិភាក្សា គឺមានលក្ខណៈស្ថាបនា និងសម្លឹង​ឆ្ពោះ​ទៅមុខ»។

តាមរយៈសេចក្ដី​ថ្លែង​ការណ៍​របស់​ក្រសួង​ការបរទេស ក្រៅពីកត់សម្គាល់​ពី​ភាព​ល្អប្រសើរជាលំដាប់​នៃ​ទំនាក់​ទំនង​របស់ប្រទេស​ទាំង២ លោក Wang បានជំរុញឲ្យ​ទីក្រុងញូវដេលី និងទីក្រុង​ប៉េកាំង មើលឃើញទំនាក់ទំនងរបស់ភាគីទាំង២ ពីទស្សនៈរយៈពេលវែង និងលើកកម្ពស់កិច្ចសហប្រតិបត្តិការ ពីទស្សនៈសកល៕