ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអង្គារ (ទី២៣ ខែមិថុនា ឆ្នាំ២០២៦) នេះថា មេដឹកនាំកូរ៉េខាងជើង គីម ជុងអ៊ុន បានប្ដេជ្ញាពង្រឹងសមត្ថភាពការពារជាតិរបស់ទីក្រុងព្យុងយ៉ាង ដោយលើកឡើងពីកិច្ចប្រឹងប្រែងធ្វើទំនើបកម្មយោធារបស់កូរ៉េខាងត្បូង និងសហរដ្ឋអាមេរិក ដែលរុញតំបន់នេះ «ឲ្យឈានទៅ​កៀក​នឹងការមាន​​សង្គ្រាមនុយក្លេអ៊ែរ»។

ទីភ្នាក់ងារសារព័ត៌មានមជ្ឈិម​កូរ៉េ (KCNA) បានដកស្រង់សម្តីរបស់លោក ដោយ​បាន​បញ្ជាក់​​ថា «សមមិត្ត គីម ជុងអ៊ុន នៅក្នុងសុន្ទរកថាបញ្ចប់របស់លោក​ បានបញ្ជាក់ជាថ្មីនូវជំហរគោលនយោបាយដ៏រឹងមាំរបស់បក្ស និងរដ្ឋរបស់យើង ក្នុងការបង្កើនសមត្ថភាពការពារជាតិឲ្យលឿនជាងមុន»។

KCNA បានឲ្យ​ដឹង​ទៀត​ថា សុន្ទរកថានេះត្រូវបានថ្លែងឡើង ខណៈពេលដែលលោក​បានធ្វើជាអធិបតីក្នុងកិច្ចប្រជុំពេញអង្គរបស់​បក្សរយៈពេល ៣ថ្ងៃ ដែលបានបញ្ចប់នៅថ្ងៃទី២២ ខែមិថុនា ក្នុងអំឡុងពេលដែលមន្ត្រីជាន់ខ្ពស់បានពិនិត្យឡើងវិញនូវគំនិតផ្តួចផ្តើមគោលនយោបាយ។

សារព័ត៌មាន​នេះ បានដកស្រង់សម្តីរបស់លោក គីម ដែលនិយាយទៀត​ថា «សហរដ្ឋអាមេរិក និងកូរ៉េខាងត្បូង កំពុងជំរុញទៅមុខដោយការ​មាន​នាវាមុជទឹកនុយក្លេអ៊ែរ ខណៈពេលដែលកាន់តែមិនបាន​លាក់បាំង ក្នុងចំណាត់ការ​របស់ពួកគេ ក្នុង​ការ​ឆ្ពោះទៅរកការពង្រឹង និងធ្វើទំនើបកម្មកងកម្លាំងប្រដាប់អាវុធ នៅក្នុងតំបន់»។

តាម​រយៈសារព័ត៌មាន​នេះ មេដឹកនាំ​កូរ៉េខាង​ជើង បានសង្កត់ធ្ងន់​ថា នៅចំពោះមុខសភាព​ការណ៍​វិវត្តបែបនេះ វាគឺជាការមាន​ «ជំហរដ៏​រឹងមាំ» របស់កូរ៉េខាងជើង ក្នុងការពន្លឿនកិច្ចប្រឹងប្រែង ដើម្បី «ពង្រីក និងពង្រឹងបន្ថែមទៀតនូវប្រព័ន្ធរារាំងដ៏មានឥទ្ធិពល និងអាចទុកចិត្តបានទាំងស្រុង ដើម្បី​ការពារខ្លួន»៕