ទីភ្នាក់ងារសារព័ត៌មាន Tasnim របស់អ៊ីរ៉ង់ បាន​រាយការណ៍​ថា លោក Mohammad Bagher Qalibaf ប្រធានសភាអ៊ីរ៉ង់ ដែលដឹកនាំក្រុមចរចាអ៊ីរ៉ង់ បាននិយាយកាលពីថ្ងៃចន្ទ (ទី២២ ខែមិថុនា ឆ្នាំ២០២៦) ថា លោកបានដើរចេញពីកិច្ចចរចា នៅប្រទេសស្វីស បន្ទាប់ពីប្រធានាធិបតីអាមេរិក លោក Donald Trump បានចេញការគំរាមកំហែង ក្នុងអំឡុងពេលចរចា។

ដោយ​បាន​និយាយ​អំពីការចរចា ដែលបានធ្វើឡើងកាលពីថ្ងៃអាទិត្យចុងសប្ដាហ៍កន្លងមក​ លោក Qalibaf បានបញ្ជាក់​ថា អ៊ីរ៉ង់បានចូលរួមកិច្ចចរចា ខណៈពេលដែលរក្សាការជំទាស់របស់ខ្លួន ចំពោះការសន្ទនាដោយផ្ទាល់ជាមួយសហរដ្ឋអាមេរិក។ លោកបាននិយាយថា៖ «យើងមានគោលការណ៍ ហើយរហូតមកដល់ពេលនេះ យើងមិនដែលចង់ក្លាយជាផ្នែកមួយនៃការសន្ទនាដូចគ្នាជាមួយអាមេរិកទេ»។

យោងតាមលោក Qalibaf បាន​ឲ្យ​ដឹង​ទៀត​ថា អន្តរការីបានទទូចថា ការជួបជុំគ្នានេះ បានក្លាយជា​ការចាប់ផ្តើមនៃការចរចា ប៉ុន្តែភាគីអ៊ីរ៉ង់ បានបញ្ជាក់យ៉ាងច្បាស់ថា ខ្លួននឹងចូលរួមតែក្នុងការចរចា មិនមែនក្នុងការពិភាក្សាដោយផ្ទាល់ជាមួយសហរដ្ឋអាមេរិកទេ។

លោក Qalibaf បានលើក​ឡើង​​ថា៖ «ពេល​ដំណើរ​ការចរចាបាន​ពាក់​កណ្ដាល​ផ្លូវ​ ខ្ញុំបានដឹងថា លោក Trump បានចេញការគំរាមកំហែងលើ​ប្រធានាធិបតី ក្រុមចរចា និងការវាយប្រហារលើទឹកដីរបស់យើង»។ ហើយ​លោកបានប្រាប់​ថា លោកបានលើកឡើងពីបញ្ហានេះជាមួយអនុប្រធានាធិបតីអាមេរិក លោក JD Vance ដោយអះអាងថា ការកត់សម្គាល់នេះបានរំលោភលើអនុស្សរណៈនៃការយោគយល់គ្នាដែលបានចុះហត្ថលេខាដោយភាគីទាំង២​។

លោក Qalibaf បានសង្កត់ធ្ងន់​​ថា គណៈប្រតិភូអ៊ីរ៉ង់បានបញ្ចប់កិច្ចប្រជុំ ហើយចាកចេញ។ លោកបាននិយាយ​ថា «យើងបានបញ្ចប់កិច្ចចរចា ចាកចេញពីកិច្ចប្រជុំ ហើយមិនបានត្រឡប់ទៅ​វិញឡើយ​»។ លោក Qalibaf បាន​ឲ្យ​ដឹង​បន្ថែម​​ ភាគីអាមេរិកក្រោយមកបានស្វែងរកកិច្ចប្រជុំមួយផ្សេងទៀត ជាមួយអ្នកសម្របសម្រួលដែលមានវត្តមាន ប៉ុន្តែទីក្រុងតេអេរ៉ង់បានបដិសេធសំណើនេះ៕