មេដឹកនាំបណ្ដោះអាសន្ន លោកស្រី Delcy Rodriguez បាននិយាយកាលពីថ្ងៃចន្ទ (ទី២២ ខែមិថុនា ឆ្នាំ២០២៦) ថា ការចាប់ខ្លួនលោក Nicolas Maduro ដោយសហរដ្ឋអាមេរិក បានជួយ​ឲ្យ​ប្រទេសវ៉េណេស៊ុយអេឡាស្ថិត​នៅលើ «ផ្លូវត្រូវ»។

អតីតអនុប្រធានាធិបតីរបស់លោក Maduro គឺលោកស្រី​ Rodriguez បានឡើងកាន់អំណាចនៅវ៉េណេស៊ុយអេឡា បន្ទាប់ពីមាន​ការ​ទម្លាក់​លោកពី​អំណាច ដោយកងកម្លាំងអាមេរិក ក្នុងអំឡុងពេលវាយឆ្មក់នៅទីក្រុងការ៉ាកាស កាលពីខែមករា។ ចាប់តាំងពីពេលនោះមក លោកស្រីបានបើកប្រទេសឡើងវិញ សម្រាប់ការវិនិយោគឯកជន និងផលប្រយោជន៍បរទេស ដែលត្រូវបានតាម​មើល​យ៉ាងដិតដល់ដោយប្រធានាធិបតីអាមេរិក លោក Donald Trump។

អំឡុង​ពេល​ថ្លែង​សុន្ទរកថា នៅឯពិធីមួយ​ ក្នុង​ទីក្រុងការ៉ាកាស លោកស្រី Rodriguez បានអបអរសាទរការចាប់​ផ្ដើម​ទំនាក់ទំនងការទូតឡើង​វិញ​ជាមួយទីក្រុងវ៉ាស៊ីនតោន ចាប់តាំងពីកងកម្លាំងអាមេរិក បានចាប់ខ្លួនមេដឹកនាំរបស់​​ប្រទេសលោកស្រី។ លោកស្រីបាននិយាយថា៖ «ថ្ងៃទី៣ ខែមករា ឆ្នាំ២០២៦ បានសម្គាល់ជា​ចំណុចរបត់មួយ នៅក្នុងនយោបាយជាតិ និងនៅក្នុងទស្សនៈរបស់យើង អំពីទំនាក់ទំនងអន្តរជាតិ»។

ដោយ​បាន​​ថ្លែងទៅកាន់ភ្ញៀវអន្តរជាតិ នៅក្នុងព្រឹត្តិការណ៍នោះ​ លោកស្រីបានបញ្ជាក់​ថា ប្រទេសវ៉េណេស៊ុយអេឡា «មិនអាចស្រមៃបានឡើយ​» នូវសម័យកាលក្រោយការ​កាន់​អំណាច​របស់​លោក Maduro នៅពេលនេះ កាលពីឆ្នាំមុន។

លោកស្រីបានសង្កត់ធ្ងន់​ថា៖ «ជិត ៦ខែ បានកន្លងផុតទៅ ហើយខ្ញុំមានអារម្មណ៍ថា វាគឺ​ជាផ្លូវដ៏​ត្រឹម​ត្រូវ»។ មេដឹកនាំ​រូប​នេះ​បាន​បន្ថែមថា ការខ្វែង​គំនិត​ដែលមានស្រាប់ រវាងប្រទេសវ៉េណេស៊ុយអេឡា និងសហរដ្ឋអាមេរិក អាចត្រូវបានដោះស្រាយ «តាមរយៈបណ្តាញការទូត»។

ទីក្រុងការ៉ាកាស និងវ៉ាស៊ីនតោន បានស្តារទំនាក់ទំនងការទូតឡើងវិញ បន្ទាប់ពីបានកាត់ផ្តាច់អស់រយៈពេលជាច្រើនឆ្នាំ ហើយទណ្ឌកម្មរបស់សហរដ្ឋអាមេរិកលើឧស្សាហកម្មប្រេងរបស់វ៉េណេស៊ុយអេឡា បានធូរស្រាល ខណៈដែលលោក Trump ចង់បានធនធានដ៏សម្បូរបែបរបស់ប្រទេសនេះ៕