លោក Yury Ushakov ជំនួយការគោលនយោបាយការបរទេសរបស់វិមានក្រឹមឡាំង នៅថ្ងៃអង្គារ (ទី២៣ ខែមិថុនា ឆ្នាំ២០២៦) នេះ បានស្វាគមន៍ ចំពោះបទឈប់បាញ់ និងការចរចា រវាងសហរដ្ឋអាមេរិក និងអ៊ីរ៉ង់ ប៉ុន្តែបានព្រមានថា ការសម្រេចបាននូវសន្តិភាពយូរអង្វែង នៅក្នុងតំបន់ នឹងត្រូវការដំណើរការដ៏វែងឆ្ងាយ​មួយ​។

អំឡុង​ពេល​ថ្លែងនៅឯ​វេទិកា Primakov Readings ក្នុងទីក្រុងមូស្គូ លោក Ushakov បានលើក​ឡើង​ថា ប្រទេស​រុស្ស៊ីសង្ឃឹមថា ការចរចាដែលបានចាប់ផ្តើមបន្ទាប់ពីមាន​ការចុះហត្ថលេខា លើអនុស្សរណៈ រវាងសហរដ្ឋអាមេរិក និងអ៊ីរ៉ង់ នឹងបង្កើតបាន​លទ្ធផល។

លោក Ushakov បាននិយាយថា៖ «រុស្ស៊ីស្វាគមន៍ ចំពោះបទឈប់បាញ់ និងការបញ្ចប់អនុស្សរណៈ រវាងសហរដ្ឋអាមេរិក និងអ៊ីរ៉ង់ ហើយយើងសង្ឃឹមថា ការចរចាដែលបានចាប់ផ្តើម នឹងទទួលបានលទ្ធផល​ជាផ្លែផ្កា​។ ប៉ុន្តែត្រូវតែទទួលស្គាល់ថា ផ្លូវដ៏​វែងឆ្ងាយទៀតនៅ​តែមាន​ មុនពេលសម្រេចបាននូវសន្តិភាពប្រកបដោយចីរភាព»។

ជាមួយ​គ្នា​នេះ លោកបានបន្ថែមថា សំណើរបស់រុស្ស៊ីទាក់ទងនឹងសារធាតុ​អ៊ុយរ៉ានី​ញ៉ូមចម្រាញ់ហើយ​របស់អ៊ីរ៉ង់ នៅតែស្ថិតក្នុង​ការ​ពិភាក្សា​ ដោយកត់សម្គាល់ថា នៅមុន​នេះ​ ទីក្រុងមូស្គូបានបង្ហាញពីការត្រៀមខ្លួនរួចជាស្រេច ក្នុងការទទួល និងរក្សាទុកសារធាតុអ៊ុយរ៉ានីញ៉ូមចម្រាញ់ហើយ​របស់អ៊ីរ៉ង់ ជាផ្នែកមួយនៃកិច្ចប្រឹងប្រែង ដើម្បីដោះស្រាយបញ្ហា ជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់៕