នាយករដ្ឋមន្ត្រីប៉ាគីស្ថាន លោក Shehbaz Sharif នៅ​ថ្ងៃអង្គារ (ទី២៣ ខែមិថុនា ឆ្នាំ២០២៦) នេះ បានប្រាប់​ឲ្យ​ដឹង​ថា សហរដ្ឋអាមេរិក និងអ៊ីរ៉ង់ នឹងពិភាក្សា អំពីបញ្ហានុយក្លេអ៊ែរ មីស៊ីលបាលីស្ទិក​ និងទ្រព្យសមកម្ម​បង្កក​របស់​អ៊ីរ៉ង់ នៅក្នុងកិច្ចពិភាក្សាកម្រិតបច្ចេកទេស ដើម្បីឈានដល់កិច្ចព្រមព្រៀងអចិន្ត្រៃយ៍ បន្ទាប់ពីមាន​នូវ​ការ​ចរចា «ដ៏​ជោគជ័យ» នៅប្រទេសស្វីស។

ក្នុងអំឡុងពេលថ្លែងសុន្ទរកថារបស់លោកទៅកាន់រដ្ឋសភា លោក Sharif បានប្រាប់សមាជិកសភាថា៖ «ភាគីទាំង២ នឹងពិភាក្សា អំពីបញ្ហានុយក្លេអ៊ែរ ទ្រព្យសកម្ម​ដែលត្រូវបានបង្កក និងបញ្ហាមីស៊ីលបាលីស្ទិក ក្នុងរយៈពេល ៦០​ថ្ងៃខាងមុខ។ យើងសង្ឃឹមថា MoU (អនុស្សរណៈ​នៃ​ការយោគយល់​គ្នា) នេះនឹងប្រែក្លាយទៅជាកិច្ចព្រមព្រៀងយូរអង្វែង ក្នុងរយៈពេល ៦០​ថ្ងៃខាងមុខនេះ​»។

លោកបានសំដៅទៅលើអនុស្សរណៈនៃការយោគយល់គ្នា នៅទីក្រុងអ៊ីស្លាម៉ាបាដ (Islamabad MoU) ដែលសហរដ្ឋអាមេរិក និងអ៊ីរ៉ង់បានចុះហត្ថលេខាកាលពីថ្ងៃទី១៧ ខែមិថុនា។ ប៉ាគីស្ថានក៏បានចុះហត្ថលេខាលើ MoU នេះ ក្នុងនាមជាអន្តរការី​ផងដែរ។

គួរបញ្ជាក់​ថា ការចរចា រវាងអ៊ីរ៉ង់ និងសហរដ្ឋអាមេរិក នៅទីក្រុង​ Burgenstock របស់​ស្វីស បានបញ្ចប់កាលពី​ព្រឹកថ្ងៃចន្ទ ដោយឈាន​ដល់​កិច្ចព្រមព្រៀងលើយន្តការជាច្រើន ដែលមានគោលបំណងជំរុញការចរចាឆ្ពោះទៅរកកិច្ចព្រមព្រៀងចុងក្រោយ ក្រោមអនុស្សរណៈនៃការយោគយល់គ្នាអ៊ីស្លាម៉ាបាដ។ កិច្ចប្រជុំនេះត្រូវបានធ្វើឡើងក្រោមការសម្របសម្រួលរបស់ប៉ាគីស្ថាន និងកាតា៕