រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយនៅថ្ងៃអង្គារ (ទី២៣ ខែមិថុនា ឆ្នាំ២០២៦) នេះថា ទីក្រុងមូស្គូបានត្រៀមខ្លួនរួចជាស្រេច ដើម្បីចាត់វិធានការចាំបាច់ទាំងអស់ ក្រោមសន្ធិសញ្ញាសន្តិសុខរបស់ខ្លួនជាមួយប្រទេសបេឡារុស ជាការ​ឆ្លើយតបទៅនឹងអ្វីដែលខ្លួនមើលឃើញថា ជាការគំរាមកំហែងពីអ៊ុយក្រែន។

អំឡុងពេល​ថ្លែង នៅឯ​ទីក្រុងមូស្គូ លោក Lavrov បាននិយាយថា ប្រទេសបេឡារុសកំពុងប្រឈមមុខនឹងការគំរាមកំហែងពីទីក្រុងគីវ ដែលមានគោលបំណងទាញទីក្រុងមីនស្ក៍ឲ្យ​ចូលទៅក្នុងជម្លោះ នៅអ៊ុយក្រែន​។

លោកបានសំដៅទៅលើការកត់សម្គាល់ថ្មីៗរបស់ប្រធានាធិបតីអ៊ុយក្រែន លោក Volodymyr Zelenskyy ដែលបាននិយាយថា លោកបានត្រៀមខ្លួនរួចជាស្រេច ដើម្បីបញ្ជាឲ្យ​មាន​ការ​វាយប្រហារ លើឧបករណ៍យោធា ប្រសិនបើវាមិនត្រូវបានដកចេញក្នុងរយៈពេល ១សប្តាហ៍ទេ​នោះ​។ លោក Lavrov បានបញ្ជាក់​ថា ឧបករណ៍ដែលមានមន្ទិល​សង្ស័យ​នេះ ត្រូវបានដាក់ពង្រាយនៅលើទឹកដីបេឡារុស នៅជិតព្រំដែនជាមួយអ៊ុយក្រែន។

លោក Lavrov បានលើក​ឡើង​ថា៖ «ខ្ញុំចង់រំលឹកដល់អ្នកនៅទីក្រុងគីវដែលមាន​ពាក់ព័ន្ធក្នុងវោហាសាស្ត្រ និងការគំរាមកំហែងបែបនេះ ក៏ដូចជាអ្នកដែលនៅលោកខាង​លិច​ដែលគាំទ្រពួកគេថា ចាប់តាំងពីខែមីនា ឆ្នាំ២០២៥ សន្ធិសញ្ញា ស្តីពីការធានាសន្តិសុខ ក្នុងក្របខ័ណ្ឌនៃរដ្ឋសហភាព បានចូលជាធរមាន រវាងសហព័ន្ធរុស្ស៊ី និងសាធារណរដ្ឋបេឡារុស»។

អ្នក​ការ​ទូតជាន់ខ្ពស់​រូប​នេះបានបន្ថែមថា៖ «ប្រសិនបើចាំបាច់ យើងត្រៀមខ្លួនរួចជាស្រេច ក្នុង​ការ​ចាត់វិធានការពេញលេញដែលមានចែងក្នុងសន្ធិសញ្ញានេះ​ ដើម្បីធានាសុវត្ថិភាពដល់​សម្ព័ន្ធមិត្តរបស់​យើង»៕