នាថ្ងៃអង្គារ (ទី២៣ ខែមិថុនា ឆ្នាំ២០២៦) នេះ ប្រធានាធិបតីអាមេរិក លោក Donald Trump បានបញ្ជាក់​ថា មូលនិធិអ៊ីរ៉ង់ណាមួយដែលត្រូវបាន​បញ្ចេញដោយក្រសួងរតនាគារសហរដ្ឋអាមេរិក នឹងត្រូវបានគ្រប់គ្រង និងដាក់​កម្រិត​យ៉ាងតឹងរ៉ឹង ដើម្បី​ទិញទំនិញមនុស្សធម៌ដែលផលិតនៅសហរដ្ឋ​អាមេរិក។

លោក Trump បានសរសេរនៅលើវេទិកាបណ្ដាញ​សង្គម Truth Social របស់លោកថា៖ «ប្រាក់ និង/ឬទណ្ឌកម្មដែលក្រសួងរតនាគារសហរដ្ឋអាមេរិកកំពុងបញ្ចេញ នឹងចូលទៅក្នុងដៃ​ភាគីទី៣ ដែលគ្រប់គ្រងដោយសហរដ្ឋអាមេរិក ហើយនឹងត្រូវបានប្រើប្រាស់ ដើម្បី​ទិញស្បៀងអាហារ និងសម្ភារៈវេជ្ជសាស្ត្រ ផ្តាច់មុខពីសហរដ្ឋអាមេរិក”។

លោកបានកត់សម្គាល់ថា មូលនិធិទាំងនេះ នឹងគាំទ្រដល់កសិករអាមេរិក តាមរយៈការនាំចេញពោត ស្រូវសាលី និងសណ្តែកសៀង ដែលលោកអះអាងថា អ៊ីរ៉ង់ «ត្រូវការយ៉ាងខ្លាំង» ដោយសារតែ «វិបត្តិមនុស្សធម៌​»។

ការណែនាំនេះធ្វើឡើងបន្ទាប់ពីមាន​ការចេញអាជ្ញាប័ណ្ណបណ្ដោះអាសន្នរយៈពេល ៦០​ថ្ងៃរបស់ក្រសួងរតនាគារ សម្រាប់ការលក់ប្រេងរបស់អ៊ីរ៉ង់ ជាផ្នែកមួយនៃក្របខ័ណ្ឌនុយក្លេអ៊ែរថ្មី។

តាម​រយៈ​ការបង្ហោះដាច់ដោយឡែកមួយ លោក Trump បានបញ្ជាក់​ថា ប្រេង ១៩​លានបារ៉ែល ជាចំនួនបំបែកកំណត់ត្រា បានឆ្លង​កាត់ច្រកសមុទ្រ Hormuz កាលពីថ្ងៃចន្ទ ដោយអះអាងថា តម្លៃ «ធ្លាក់ចុះ» ហើយពិភពលោកកាន់តែមានសុវត្ថិភាព៕