ប្រព័ន្ធផ្សព្វផ្សាយរដ្ឋបានរាយការណ៍នៅ​ថ្ងៃអង្គារ (ទី២៣ ខែមមិថុនា ឆ្នាំ២០២៦) ថា សមាជិកសភាចិនកំពុងជជែក​ពិភាក្សា អំពីច្បាប់ជាមូលដ្ឋានដំបូងរបស់ប្រទេសដែលគ្រប់គ្រងលើវិស័យហិរញ្ញវត្ថុ ដោយ​មានគោលបំណងការពារហានិភ័យ និងលើកកម្ពស់ការអភិវឌ្ឍន៍ប្រកបដោយគុណភាពខ្ពស់។

សារព័ត៌មាន​ Xinhua បានរាយការណ៍ថា សេចក្តីព្រាងច្បាប់នេះត្រូវបានលើក​ឡើង នៅ​ថ្ងៃអង្គារនេះ នៅឯសម័យប្រជុំកំពុងបន្តនៃ​គណៈកម្មាធិការអចិន្ត្រៃយ៍នៃសភាប្រជាជនជាតិ ដែលជាស្ថាប័ន​នីតិប្បញ្ញត្តិជាតិ សម្រាប់ដំណាក់​កាល​ដំបូង​របស់ច្បាប់​នេះ​។ ដោយ​ត្រូវបាន​ចេញរួមគ្នាដោយក្រសួងយុត្តិធម៌ ធនាគារប្រជាជនចិន និងនិយតករហិរញ្ញវត្ថុធំ​ៗផ្សេងទៀត សេចក្តីព្រាងច្បាប់នេះត្រូវបានបើកឲ្យ​មានការពិគ្រោះយោបល់ជាសាធារណៈ រហូតដល់ថ្ងៃទី១៩​ ខែមេសា។

ច្បាប់នេះ​​មាន​គោលបំណង​ពង្រឹង​បទប្បញ្ញត្តិ ការពារ និង​កាត់បន្ថយ​ហានិភ័យ​ផ្នែក​ហិរញ្ញវត្ថុគ្រប់ជ្រុង​ជ្រោយ​ និង​លើកកម្ពស់​ការអភិវឌ្ឍ​ប្រកបដោយ​គុណភាព​ខ្ពស់​។ សេចក្តីព្រាងច្បាប់នេះក៏បានកំណត់ផង​ដែរ​នូវតម្រូវការលើសលប់ សម្រាប់ការងារហិរញ្ញវត្ថុ រួមទាំងការលើកកម្ពស់​ការដឹកនាំបែប​មជ្ឈការ​ និងវិធីសាស្រ្តដែលផ្តោតលើប្រជាជន ខណៈពេលដែលកំណត់គោលដៅនីតិបញ្ញត្តិ ក្នុងការកសាងប្រព័ន្ធហិរញ្ញវត្ថុដ៏រឹងមាំ ដើម្បីគាំទ្រដល់ទំនើបកម្មរបស់ចិន។ ច្បាប់នេះ​រួមបញ្ចូលបន្ថែម​ទៀត​នូវវិធានការ ដើម្បីធ្វើទំនើបកម្មប្រព័ន្ធធនាគារកណ្តាល កែលម្អការគ្រប់គ្រងផ្ដោត​លើ​សេដ្ឋ​កិច្ច​ទាំង​មូល​ និង​ហានិភ័យ​ និងធានាស្ថិរភាពរូបិយប័ណ្ណ និងហិរញ្ញវត្ថុ។

ចិនគឺជាប្រទេស​មាន​សេដ្ឋកិច្ចធំបំផុត​ជាងគេ​ទី២ របស់ពិភពលោក ហើយច្បាប់នេះត្រូវបានគេមើលឃើញថា ជាជំហានដ៏សំខាន់មួយឆ្ពោះទៅរកការបង្រួបបង្រួមនៃការត្រួតពិនិត្យប្រព័ន្ធហិរញ្ញវត្ថុដ៏ធំរបស់ខ្លួន៕