ប្រធានាធិបតីរុស្ស៊ី លោក Vladimir Putin បាននិយាយនៅ​ថ្ងៃអង្គារ (ទី២៣ ខែមិថុនា ឆ្នាំ២០២៦) នេះ​​ថា អ៊ុយក្រែនកំពុងវាយប្រហារហេដ្ឋារចនាសម្ព័ន្ធស៊ីវិល នៅក្នុងប្រទេសរុស្ស៊ី ដែល​ជាការ​ប៉ុនប៉ងធ្វើឲ្យ​សង្គមអស្ថិរភាព។

ការវាយប្រហាររបស់អ៊ុយក្រែនលើរោងចក្រចម្រាញ់ប្រេង បានកើនឡើងទ្វេដង ចាប់តាំងពីដើមឆ្នាំ២០២៦ ដែលនាំឲ្យ​មានការ​តម្រង់ជួរដ៏​វែង ដើម្បី​ចាក់សាំង​ ហើយ​តម្លៃប្រេងសាំងឡើង​ខ្ពស់ នៅក្នុងតំបន់មួយចំនួន​។ ទីក្រុងគីវ បានបញ្ជាក់​ថា គោលបំណងរបស់ខ្លួន គឺដើម្បីធ្វើ​ឲ្យ​ចុះខ្សោយ​ដល់​ប្រភពសំខាន់នៃការ​ផ្ដល់​មូលនិធិដល់​សង្គ្រាមរបស់រុស្ស៊ី និងបង្ហាញដល់ប្រជាជនរុស្ស៊ីថា ជម្លោះមក​កៀក​នឹង​ខ្លួន​ហើយ។

អំឡុង​ពេល​ថ្លែងទៅកាន់និស្សិតបញ្ចប់ការសិក្សា ពីស្ថាប័នយោធា និងសន្តិសុខ លោក Putin បានធ្វើការកត់សម្គាល់ជាលើកដំបូងរបស់លោក ជុំវិញ​ការវាយប្រហារ ចាប់តាំងពីយានដ្រូន​របស់អ៊ុយក្រែន បានវាយប្រហាររោងចក្រចម្រាញ់ប្រេងមួយកន្លែងនៅទីក្រុងមូស្គូ កាលពីសប្តាហ៍មុន។

នៅក្នុងកិច្ចប្រជុំដែល​ត្រូវ​បាន​ផ្សាយ​តាម​កញ្ចក់​ទូរទស្សន៍ លោកបានលើ​កឡើងថា៖ «ការវាយប្រហារលើហេដ្ឋារចនាសម្ព័ន្ធស៊ីវិល តើពួកគេមានគោលបំណងអ្វី? គឺ​ដើម្បីធ្វើឲ្យ​សង្គមអស្ថិរភាព ក្នុងចំណោមការវាយប្រហារដ៏ធំបែបនេះ នៅពេលដែលលោកខាងលិចទាំងមូល កំពុងធ្វើការឲ្យពួកគេ ហើយយានដ្រូន​ទាំងនេះកំពុងមកក្នុងចំនួនដ៏ច្រើន ដើម្បីបង្កើតអារម្មណ៍មិនប្រាកដប្រជា អំពីវិធានការ​​របស់កងកម្លាំងប្រដាប់អាវុធរុស្ស៊ី»។

ជាមួយ​គ្នានេះ មេដឹកនាំរុស្ស៊ី​ក៏បាននិយាយផងដែរថា កងទ័ពរុស្ស៊ីជិតដណ្តើមគ្រប់គ្រង​ទីក្រុង​​ Kostiantynivka ជាទីគាំទ្រ​ដ៏​សំខាន់ ​នៅ​ភាគខាងត្បូង ពោលគឺ​ជា​អ្វីដែលត្រូវបាន​ហៅថា «ខ្សែក្រវាត់បន្ទាយ» នៅក្នុងតំបន់ Donetsk ដែលទីក្រុងមូស្គូបានទាមទារឲ្យ​ទីក្រុងគីវព្រម​បោះបង់៕