កីឡាករបាល់ទះជម្រើសជាតិកម្ពុជា វឿន វាសនា នឹងទទួលបានថ្លៃពលកម្មជាង ១០ម៉ឺនដុល្លារ ក្នុងមួយរដូវកាល បន្ទាប់ពីរូបគេ ត្រូវបានសម្រេចបន្ដកុងត្រាថ្មី ជាមួយក្លិបតៃវ៉ាន់ Win Streak សម្រាប់រដូវកាលឆ្នាំ២០២៦/២៧ ខាងមុខ។ នេះបើតាមការបញ្ជាក់របស់លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា។

មុនការទម្លាយពីតម្លៃពលកម្មជាសាធារណៈនេះ កាលពីចុងសប្ដាហ៍កន្លងទៅ ក្លិប Win Streak បានប្រកាសជាផ្លូវការ អំពីការបន្ដកិច្ចសន្យាថ្មី ជាមួយ វឿន វាសនា ត្រូវនឹងរដូវកាលទី៤ ដែលស្ដាត់ស្ដាំវ័យ ២៥ឆ្នាំរបស់កម្ពុជារូបនេះ ត្រូវបន្ដអាជីពនៅលីគបាល់ទះតៃវ៉ាន់ បន្ទាប់ពីរូបគេ ធ្វើបានយ៉ាងល្អ និងសាងកំណត់ត្រាដ៏គួរឲ្យភ្ញាក់ផ្អើល សម្រាប់ការបង្ហាញខ្លួន ៣រដូវកាលកន្លងមក។

លោកបណ្ឌិត អាំង សិរីពិសិដ្ឋ បានបញ្ជាក់ថា វឿន វាសនា នឹងត្រឡប់ទៅចូលរួមជាមួយក្លិប Win Streak វិញ ក្រោយបញ្ចប់ភារកិច្ចជាមួយក្រុមជម្រើសជាតិកម្ពុជា ក្នុងព្រឹត្តិការណ៍បាល់ទះជើងឯកអាស៊ីអាគ្នេយ៍ SEA V.League ឆ្នាំ២០២៦ ដែលគ្រោងប្រកួតដំណាក់កាលទី១ នៅហ្វីលីពី ពីថ្ងៃទី១៥ ដល់ថ្ងៃទី១៩ ខែកក្កដា និងដំណាក់កាលទី២ ប្រកួតពីថ្ងៃទី២២ ដល់ថ្ងៃទី២៦ ខែកក្កដាខាងមុខ នៅប្រទេសឥណ្ឌូនេស៊ី។

ជាមួយការផ្ទេរពីក្លិបវិសាខា ទៅកាន់ក្លិបលីគកំពូលតៃវ៉ាន់នេះដែរ ទោះបីមិនបានបញ្ជាក់ច្បាស់ពីតម្លៃពលកម្មដែល វាសនា ត្រូវទទួលបាន តែមន្ដ្រីជាន់ខ្ពស់សហព័ន្ធដដែល បានបង្ហើបយ៉ាងហោច ១ឆ្នាំ វឿន វាសនា ទទួលបានតម្លៃពលកម្មជាង ១០ម៉ឺនដុល្លារ។ នេះគឺជាតម្លៃពលកម្មកំណត់ត្រាមួយសម្រាប់កីឡាករបាល់ទះអាជីពកម្ពុជា ហើយក៏ជាគំរូមួយ សម្រាប់យុវជនជំនាន់ក្រោយខំប្រឹង ដើម្បីទទួលបានឱកាសដូចកីឡាករមានដើមកំណើតពីខេត្តបាត់ដំបងនេះផងដែរ។

គួរដឹងថា ៣រដូវកាលកន្លងមក ដែល វាសនា បានចូលរួមជាមួយ Win Streak រូបគេបានជួយក្លិបឈ្នះជើងឯកលីគតៃវ៉ាន់ ២រដូវកាលជាប់គ្នា កាលពីឆ្នាំ២០២៣/២៤ និងឆ្នាំ២០២៤/២៥ តែសោកស្ដាយឆ្នាំ២០២៥/២៦ បន្ទាប់ពីរួមចំណែកជួយក្រុមឈានដល់ជុំផ្ដាច់ព្រ័ត្រ វាសនា បានខកខានលេងដោយសារបទបញ្ញត្តិរបស់សហព័ន្ធបាល់ទះអន្ដរជាតិ ដែលកំណត់មិនឲ្យកីឡាករជាប់ជម្រើសជាតិលេង មិនអាចជួយក្រុមការពារជើងឯកបានឡើយ។

យ៉ាងណាការធ្វើបានយ៉ាងល្អ ពិសេសការបំបែកកំណត់ត្រាក្លាយជាកីឡាករក្នុងលីគបាល់ទះតៃវ៉ាន់ដំបូងគេ ដែលអាចរកបានលើស ១ពាន់ពិន្ទុក្នុងមួយរដូវកាល ពោលគឺចំនួន ១,០២៨ ពិន្ទុរបស់ វឿន វាសនា បានធ្វើឲ្យអ្នកគាំទ្រក្លិប Win Streak សប្បាយរីករាយ និងគាំទ្រពេញទំហឹង បន្ទាប់ពីក្លិបសម្រេចបន្ដកុងត្រាជាមួយកីឡាករជម្រើសជាតិកម្ពុជារូបនេះ ស្របពេលក្លិបបានរុះរើកីឡាករជាច្រើន សូម្បីគ្រូបង្វឹក ដើម្បីត្រៀប្រកួតជើងឯកនារដូវកាលថ្មីខាងមុខ៕ អត្ថបទ លី ឈុនឡា