គណៈកម្មការឯករាជ្យរបស់អង្គការសហប្រជាជាតិ បាននិយាយកាលពីថ្ងៃអង្គារ ទី២៣ ខែមិថុនា ថា អាជ្ញាធរ និងកងកម្លាំងសន្តិសុខអ៊ីស្រាអែល បានកំណត់គោលដៅលើកុមារប៉ាឡេស្ទីនដោយចេតនា បណ្តាលឱ្យមានអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាមនៅក្នុងតំបន់ហ្កាហ្សា និងឧក្រិដ្ឋកម្មសង្គ្រាមនៅតំបន់កាន់កាប់ West Bank។

របាយការណ៍របស់គណៈកម្មការស៊ើបអង្កេតអន្តរជាតិឯករាជ្យរបស់អង្គការសហប្រជាជាតិស្តីពីដែនដីប៉ាឡេស្ទីនរួមទាំងទីក្រុងយេរូសាឡឹមខាងកើត និងអ៊ីស្រាអែល បានពិនិត្យឃើញពីការរំលោភបំពានលើកុមារប៉ាឡេស្ទីន ចាប់តាំងពីការចាប់ផ្តើមសង្គ្រាមរវាងអ៊ីស្រាអែល និងក្រុមហាម៉ាស នៅថ្ងៃទី៧ ខែតុលា ឆ្នាំ២០២៣។

របាយការណ៍នេះបានរកឃើញថា ប្រហែល៣០% នៃអ្នកដែលត្រូវបានសម្លាប់នៅក្នុងសង្គ្រាមតំបន់ហ្កាហ្សា គឺជាកុមារ។ របាយការណ៍កាលពីពេលមុនរបស់គណៈកម្មការក្នុងខែកញ្ញា បានរកឃើញថា អ៊ីស្រាអែល បានប្រព្រឹត្តអំពើប្រល័យពូជសាសន៍នៅតំបន់ហ្កាហ្សា ហើយមន្ត្រីជាន់ខ្ពស់អ៊ីស្រាអែល រួមទាំងនាយករដ្ឋមន្ត្រី លោក Benjamin Netanyahu បានញុះញង់ឱ្យប្រព្រឹត្តអំពើទាំងនេះ ជាការចោទប្រកាន់ដែលអ៊ីស្រាអែលហៅថាជារឿងធ្វើឲ្យខូចឈ្មោះ។ គណៈកម្មការអង្គការសហប្រជាជាតិបាននិយាយថា កុមារប៉ាឡេស្ទីនត្រូវបានគេកំណត់គោលដៅ និងសម្លាប់ដោយចេតនាក្នុងអំឡុងពេលសង្គ្រាម រួមទាំងបន្ទាប់ពីបទឈប់បាញ់បានចូលជាធរមាននៅក្នុងខែតុលា ឆ្នាំ២០២៥។ គណៈកម្មការ បាននិយាយថា នេះគឺជាធាតុផ្សំសំខាន់ដែលបង្កើតបំណងប្រល័យពូជសាសន៍ដោយអាជ្ញាធរ និងកងកម្លាំងសន្តិសុខអ៊ីស្រាអែល ដើម្បីបំផ្លាញក្រុមប៉ាឡេស្ទីនទាំងមូល ឬដោយផ្នែកនៅក្នុងតំបន់ហ្កាហ្សា។