​ស្នូកឃ័រ​៖ ​ជើងឯក​ស្នូកឃ័រ​ពិភពលោក ៦សម័យ Ronnie O’Sullivan បាន​នាំមុខ​ក្នុងដំណាក់កាល​ដំបូង ១១-៥ហ្វ្រេ​ម​លើ​កីឡាករ​ស្កុ​ត​ឡេ​ន Stephen Maguire នៅ​វគ្គ ៨នាក់​ចុងក្រោយ​ស្នូកឃ័រ​ជើងឯក​ពិភពលោក​។

ការប្រកួត​វគ្គ ៨នាក់​ចុងក្រោយ​ត្រូវធ្វើឡើង​រយៈពេល​ពីរ​ថ្ងៃ ​ខណៈដែល​ថ្ងៃ​ដំបូង​ម្សិលមិញ​ពេលព្រឹក O’Sullivan នាំមុខ ៦-២ហ្វ្រេ​ម​មុនពេល​ដែល Maguire តប​បាន​ពីរ​ហ្វ្រេ​ម​វិញ ៦-៤​។ ​​តែ​ក្រោយមក​នៅពេល​កីឡាករ​លំដាប់​លេខ ១ ពិភពលោក​ក៏បាន​យកឈ្នះ ៥ហ្វ្រេ​ម​ជាប់​គ្នា មុនពេល​ដែល Maguire បាន​មួយ​ហ្វ្រេ​ម​ចុងក្រោយ​។ ​លទ្ធផល​បណ្តោះអាសន្ន ១១-៥ហ្វ្រេ​ម​នេះ​មានន័យថា Ronnie O’Sullivan ត្រូវការ​ឈ្នះ​តែ ២ហ្វ្រេ​ម​ទៀត​ប៉ុណ្ណោះ​ដើម្បី​ឡើង​វគ្គ​ពាក់កណ្តាល​ផ្តាច់ព្រ័ត្រ​ជើងឯក​ពិភពលោក​លើក​ទី ១៣​។

​​ដោយឡែក​លទ្ធផល​ផ្សេងទៀត​កីឡាករ​ចិន Yan Bingtao វាយបក​ពីក្រោយ​ពី​ការនាំ​មុខ ៦-២ របស់ Mark Williams រហូត​តាម​ស្មើ​វិញ ៨-៨ហ្វ្រេ​ម​។ ​ចំណែកឯ​ជើងឯក​ឆ្នាំ២០១៩ Judd Trump កំពុង​នាំមុខ​មិត្ត​រួម​ជាតិ​អង់គ្លេស Stuart Bingham ៥-៣ហ្វ្រេ​ម និង John Higgins នាំមុខ ៥-៣ហ្វ្រេ​ម​ផងដែរ​លើ Jack Lisowski៕

​អត្ថបទ​៖​នាង សុភា​វុ​ធ