មានពាក្យបណ្តឹងឃាតកម្មចំនួនបីត្រូវបានដាក់ប្រឆាំងនឹងជនសង្ស័យអាយុ១៤ ឆ្នាំនៅក្នុងការបាញ់ប្រហារនៅសាលា Tacloban City របស់ប្រទេសហ្វីលីពីន។

លោកវរសេនីយ៍ឯក Allen Rae Co ប្រធានព័ត៌មានសាធារណៈនៃនគរបាលជាតិហ្វីលីពីន (PNP) បានបញ្ជាក់រឿងនេះ ខណៈកំពុងនិយាយជាមួយអ្នកយកព័ត៌មាននៅទីស្នាក់ការកណ្តាលក្រុមស៊ើបអង្កេត និងតាមដានបទព្រហ្មទណ្ឌ (CIDG) ក្នុងតំបន់ Camp Crame របស់ទីក្រុង Quezon នៅព្រឹកថ្ងៃពុធ២៤មិថុនានេះ។

លោក Co បានបន្ថែមថា ជនសង្ស័យអាយុ ១៥ ឆ្នាំក៏ប្រឈមនឹងពាក្យបណ្តឹងឃាតកម្ម និងរបួសរាងកាយជាច្រើនដែលទាក់ទងនឹងហេតុការណ៍នេះផងដែរ។

ជនសង្ស័យអាយុ ១៥ ឆ្នាំ ដែលលោក Co ធ្លាប់បានកំណត់អត្តសញ្ញាណមានឈ្មោះថា "Rod" និងជនសង្ស័យអាយុ១៤ ឆ្នាំម្នាក់ ឈ្មោះ "Nash" បានបើកការបាញ់ប្រហារនៅខាងក្នុងវិទ្យាល័យជាតិ San Jose កាលពីព្រឹកថ្ងៃចន្ទដើមសប្ដាហហ៍នេះ។

សិស្សបីនាក់ត្រូវបានសម្លាប់ ខណៈដែលមនុស្សជាច្រើននាក់ទៀតបានរងរបួស។

អនីតិជនទាំងពីរនាក់ស្ថិតនៅក្រោមការឃុំឃាំងរបស់នគរបាល និងនាយកដ្ឋានសុខុមាលភាពសង្គម និងអភិវឌ្ឍន៍។

ច្បាប់សាធារណរដ្ឋលេខ 9344 ឬច្បាប់យុត្តិធម៌ និងសុខុមាលភាពអនីតិជនចែងថា កុមារអាយុ ១៥ ឆ្នាំ និងក្មេងជាងនេះត្រូវបានលើកលែងពីការទទួលខុសត្រូវព្រហ្មទណ្ឌ ហើយផ្ទុយទៅវិញនឹងត្រូវទទួលបានកម្មវិធីអន្តរាគមន៍។

ច្បាប់នេះក៏បានចែងផងដែរថា កុមារដែលមានអាយុលើសពី ១៥ ឆ្នាំ ប៉ុន្តែក្មេងជាង១៨ ឆ្នាំត្រូវទទួលខុសត្រូវព្រហ្មទណ្ឌលុះត្រាតែពួកគេធ្វើសកម្មភាពដោយមានការវិនិច្ឆ័យ៕