ខេត្តកណ្ដាល៖ រដ្ឋបាលស្រុកកណ្តាលស្ទឹង និងក្រុមយុវជនមនុស្សធម៌នៅព្រឹកថ្ងៃទី២៧ ខែមេសា ឆ្នាំ២០២២នេះ បានផ្តល់ នូវស័ង្កសី​ជាច្រើនសន្លឹកដល់សាលាបឋមសិក្សាជើងកើប ដែល​ស្ថិត​នៅ​ភូមិធំ ឃុំជើងកើប ស្រុកកណ្តាលស្ទឹង ខេត្តកណ្តាល ​ដើម្បី​ប្រក់​ដំបូល​សាលាមួយខ្នង​ដែលមាន​ប្រវែង ៤០ម៉ែត្រ បន្ទាប់សាលានេះ​បានធ្លុះធ្លាយ​ហើយរំខាន​ដល់ការ​សិក្សា​របស់​សិស្សានុសិស្សនោះ។

ក្រៅពីផ្តល់នូវស័ង្កសីសម្រាប់ប្រក់ដំបូលសាលា រដ្ឋបាលស្រុក និងក្រុមយុវជនមនុស្សធម៌ ក៏បានសំណេះសំណាល និងផ្តល់អំណោយដល់លោកគ្រូ អ្នកគ្រូ និងសិស្សានុសិស្ស​នៅ​សាលា​បឋម​សិក្សា​ខាងលើនេះផងដែរ ដោយអំណោយទាំងនេះគឺបង្ហាញអំពីទឹកចិត្តសាមគ្គីគ្នារវាងខ្មែរ និងខ្មែរ ដើម្បី​រួមគ្នាលើកស្ទួយដល់សង្គមនោះ។

ថ្លែងនៅក្នុងពិធីប្រគល់ និងសំណេះសំណាលនេះ លោក សាន សាវុន ក្រុមការងារស្រុកកណ្តាលស្ទឹង បានលើកឡើងថា អំណោយមនុស្សធម៌ និងស័ង្កសី​ដែលបាន​ប្រគល់​ជូនដល់​សាលា​បឋម​សិក្សា លោកគ្រូ អ្នកគ្រូ និងសិស្សានុសិស្សនេះ គឺបានមកពីក្រុមយុវជនមនុស្សធម៌ ដែល​ដឹកនាំ​ដោយ​លោក ណន ពៅ ប្រធានក្រុមយុវជនមនុស្សធម៌។

លោកសាន សាវុន បានបន្តទៀតថា ក្រុមយុវជនមនុស្សធម៌ តែងតែចុះ ជួយ​ដល់​បងប្អូន​ប្រជាពលរដ្ឋ​ក្រីក្រ​ជានិច្ច មិនថាកាលៈទេសៈណានោះឡើយ ហើយសកម្មភាពមនុស្សធម៌ នេះ​គឺ​ជា​ការ​បង្ហាញនូវទឹកចិត្តចូលរួមជាមួយរាជរដ្ឋាភិបាល ក្នុងការជួយ​កាត់​បន្ថយ​ភាព​ក្រីក្រ​របស់​ប្រជាពលរដ្ឋ និងជួយគ្នា ក្នុងគ្រាក្រ។ ជាក់ស្តែងដូចថ្ងៃនេះជាដើម លោក ណន ពៅ ប្រធាន​ក្រុម​យុវជន​មនុស្សធម៌ បានរៃអង្គាស់គ្នា ដើម្បីទិញស័ង្គសីមកផ្តល់ជូនសាលា បន្ទាប់ពី​មាន​ការ​ស្នើ​សុំ​របស់​លោក​គ្រូ អ្នកគ្រូនោះ​៕ អត្ថបទ៖ បាន ចក់