អង្គការសហប្រជាជាតិបានព្រមានកាលពីថ្ងៃអង្គារថា ប្រជាជនស៊ីរីជាង ១៣ លាននាក់ គឺជាងពាក់កណ្តាលនៃចំនួនប្រជាជន កំពុងប្រឈមនឹងអសន្តិសុខស្បៀងយ៉ាងធ្ងន់ធ្ងរ ដោយអំពាវនាវឲ្យមានការសម្អាតវាលស្រែដែលមានគ្រាប់រំសេវផ្ទុះ ដើម្បីស្តារវិស័យកសិកម្មនៅក្នុងប្រទេសដែលរងការបំផ្លិចបំផ្លាញដោយសង្គ្រាមនេះ។

អង្គការស្បៀងអាហារ និងកសិកម្ម(FAO)របស់អង្គការសហប្រជាជាតិ បាននិយាយថា ការប្រែក្លាយវាលស្រែដែលពោរពេញទៅដោយគ្រាប់រំសេវមិនទាន់ផ្ទុះ បន្ទាប់ពីសង្គ្រាមស៊ីវិលដ៏ឃោរឃៅ ទៅជាដីដែលមានផលិតភាព អាចជួយដោះស្រាយវិបត្តិស្បៀងអាហារ នៅក្នុងប្រទេសស៊ីរី។

លោក Pirro-Tomaso Perri តំណាងស្តីទីរបស់អង្គការ FAO ប្រចាំប្រទេសនេះ បាននិយាយថា៖«វិស័យកសិកម្មរបស់ប្រទេសស៊ីរី កំពុងស្ថិតក្នុងពេលវេលាដ៏សំខាន់មួយ»។

បន្ទាប់ពីជម្លោះរយៈពេល ១៤ ឆ្នាំ គ្រោះរាំងស្ងួតម្តងហើយម្តងទៀត ការលំបាកផ្នែកសេដ្ឋកិច្ច ប្រព័ន្ធធារាសាស្រ្តដែលខូចខាត សេវាកម្មចុះខ្សោយ ទីផ្សារដែលរំខាន និងការបំពុលគ្រាប់រំសេវផ្ទុះយ៉ាងទូលំទូលាយ ជីវភាពរស់នៅជនបទ នៅតែស្ថិតនៅក្រោមសម្ពាធយ៉ាងខ្លាំង»។

លោកបាននិយាយថា មានមនុស្សប្រហែល ១៣,៤ លាននាក់ កំពុងប្រឈមនឹងអសន្តិសុខស្បៀងយ៉ាងធ្ងន់ធ្ងរ ខណៈដែលសម្រាប់ប្រជាជនស៊ីរីជាច្រើននៅជនបទ ការធ្វើស្រែចម្ការ ការចិញ្ចឹមសត្វ ការប្រមូលផលដំណាំ អាចគំរាមកំហែងដល់អាយុជីវិត៕