ប្រធានទីភ្នាក់ងារនុយក្លេអ៊ែររបស់អង្គការសហប្រជាជាតិ បានបង្ហើបឲ្យដឹងនៅថ្ងៃពុធនេះថា ទីតាំងចម្រាញ់សារធាតុអ៊ុយរ៉ានីញ៉ូមរបស់អ៊ីរ៉ង់នឹងត្រូវបានក្រុមអធិការកិច្ចរបស់លោកទៅត្រួតពិនិត្យ ដែលជាសមាសធាតុសំខាន់មួយនៅក្នុងកិច្ចព្រមព្រៀងបណ្តោះអាសន្នរវាងសហរដ្ឋអាមេរិក និងអ៊ីរ៉ង់ ដើម្បីឈានដល់ការបញ្ចប់សង្គ្រាម។

ការអត្ថាធិប្បាយរបស់ប្រធានទីភ្នាក់ងារថាមពលបរមាណូអន្តរជាតិ (IAEA) លោក Rafael Mariano Grossi គឺជាមតិយោបល់ដ៏រឹងមាំបំផុតពីទីភ្នាក់ងារអង្គការសហប្រជាជាតិ ដែលត្រូវបានគេមើលឃើញថា ជាគន្លឹះក្នុងការកំណត់ស្ថានភាពនៃឃ្លាំងស្តុកនុយក្លេអ៊ែររបស់អ៊ីរ៉ង់។

ចាប់តាំងពីអ៊ីស្រាអែល បានចាប់ផ្តើមសង្គ្រាមរយៈពេល ១២ ថ្ងៃ លើប្រទេសអ៊ីរ៉ង់ ក្នុងឆ្នាំ ២០២៥ IAEA ត្រូវបានរារាំងដោយទីក្រុងតេអេរ៉ង់ពីការចុះទៅត្រួតពិនិត្យទីតាំងចម្រាញ់ ជាកន្លែងដែលសាធារណរដ្ឋឥស្លាមនេះ ត្រូវបានគេជឿថា រក្សាទុកអ៊ុយរ៉ានីញ៉ូមដែលចម្រាញ់រួចមានធាតុសុទ្ធកម្រិតខ្ពស់ ដើម្បីអាច ផលិតអាវុធនុយក្លេអ៊ែរបានរហូតដល់ ១០គ្រាប់ ប្រសិនបើប្រទេសនេះជ្រើសរើសប្រញាប់ប្រញាល់សម្រាប់ផលិតអាវុធនេះ។ អ៊ីរ៉ង់បានអះអាងជាយូរមកហើយថា កម្មវិធីរបស់ខ្លួន គឺសន្តិភាព ទោះបីជាខ្លួនជាប្រទេសតែមួយគត់នៅក្នុងពិភពលោក ដែលបានចម្រាញ់អ៊ុយរ៉ានីញ៉ូមរួចមានធាតុសុទ្ធរហូតដល់៦០ភាគរយដោយគ្មានកម្មវិធីអាវុធក៏ដោយ។

សហរដ្ឋអាមេរិក និងអ៊ីរ៉ង់កាលពីថ្ងៃអង្គារបានផ្តល់ការអត្ថាធិប្បាយផ្ទុយគ្នាអំពីថាតើទីតាំងទាំងនោះនឹងត្រូវបានត្រួតពិនិត្យឬអត់៕