ភ្នំពេញ៖ អង្គការ អ៊ីណូដូ (IL NODO) បន្តគម្រោងផ្តល់អាហារូបត្ថម្ភ និងសម្ភារៈសម្រាប់ផ្តល់កូនតាមម្តាយ និងស្ត្រីមានផ្ទៃពោះ ក្រោមគម្រោងចំណាយប្រមាណ ១១ ម៉ឺនដុល្លារអាមេរិក ដោយអនុវត្តរយៈពេល ០៣ឆ្នាំ នៅក្នុងពន្ធនាគារ នៃមណ្ឌលអប់រំកែប្រែទី ២ ។

លោកស្រី ម៉ាទីណា កាន់តាណា ប្រធានអង្គការ អ៊ីណូដូ (IL NODO) លើកឡើងនៅក្នុងពិធីចុះហត្ថ​លេខា​លើកិច្ច​ព្រមព្រៀង​ រវាងអគ្គនាយកដ្ឋាន​ពន្ធនាគារ ​ជាមួយអង្គការ អ៊ីណូដូ នៅថ្ងៃទី ២៧ ខែ មេសា ឆ្នាំ ២០២២ នេះថា អង្គការ អ៊ីណូដូ ​បានបង្កើតឡើងនៅឆ្នាំ២០០៨ ​នៅប្រទេសអ៊ីតាលី និងបានចុះបញ្ជីនៅប្រទេសកម្ពុជា, ជាអង្គការ​មិនមែន​រដ្ឋាភិបាលអន្តរជាតិ ជាមួយនឹង​អនុស្សរណៈយោគយល់គ្នា រវាងក្រសួងការបរទេស និងសហប្រតិបត្តិការអន្តរជាតិ ជាលើកដំបូង​នៅឆ្នាំ២០១០, រហូតមកដល់បច្ចុប្បន្នអង្គការ អ៊ីណូដូ បានចាប់ផ្តើមធ្វើសកម្មភាពមនុស្សធម៌ ជួយ​ដល់ជនជាប់ឃុំជាស្ត្រីមានផ្ទៃពោះ ​និងកូនតាមម្ដាយ​ នៅក្នុងពន្ធនាគារ នៃខេត្តគោលដៅ មានចំនួន ១៥ បើគិតមកដល់ខែមីនា ​ឆ្នាំ២០២២ នេះ អ៊ីណូដូ ​បានផ្តល់អាហារូបត្ថម្ភ ​សម្ភារៈសម្រាប់កូន តាមម្តាយ​ចំនួនជាង ១ ពាន់នាក់ និងស្ត្រីមានផ្ទៃពោះ ជាជនជាប់ឃុំចំនួន ​៦២២ នាក់ ដោយ​ចំណាយ​ថវិកាសរុបជាង ​២៨ ម៉ឺនដុល្លារអាមេរិក។

លោកស្រី បន្តថា ដោយសង្កេតឃើញចំនួនកូនតាមម្តាយ និងស្ត្រីមានផ្ទៃពោះសរុបទូទាំងប្រទេស​មាន​ការកើនឡើង ក្នុងនោះ អ៊ីណូដូ បានសម្រេច​យកពន្ធនាគារដែលមានចំនួនកុមារច្រើនជាងគេ គឺមណ្ឌលអប់រំកែប្រែទី២ ​ដើម្បីបន្តធ្វើសកម្មភាពរបស់ខ្លួន ​ក្នុងការផ្តល់សម្ភារៈអាហារូបត្ថម្ភ ការ​សិក្សាអប់រំ ថ្នាក់មត្តេយ្យសិក្សាដល់កុមារតូចៗ ​និងការថែទាំសុខភាពដល់កូនតាមម្តាយ និង​ស្ត្រីមានផ្ទៃពោះជាជនជាប់ឃុំ, ចំណែកកិច្ចព្រមព្រៀងបន្ត មានរយ.ពេល ៣ឆ្នាំ គឺឆ្នាំ២០២២-២០២៥ សម្រាប់ការបន្តផ្តល់​អាហារូបត្ថម្ភ ​និងសម្ភារៈសម្រាប់ផ្តល់កូនតាមម្តាយ​ និងស្ត្រីមានផ្ទៃពោះ របស់​អ៊ីណូដូ ​គឺដើម្បីឲ្យពួកគេទទួល​បាន​អត្ថប្រយោជន៍​ក្នុងជំហាន​បន្ទាប់នេះ។

ជុំវិញគម្រោងខាងលើ, ឯកឧត្តម ឧត្តអគ្គានុរក្សថ្នាក់លេខ១ ព្រំ ចាន់នី ប្រធាននាយកដ្ឋានអប់រំកែប្រែ និងស្តារនីតិសម្បទា ថ្លែងថា តាមរយៈកិច្ចសហការល្អ និងកាអនុវត្តដោយជោគជ័យ​នៃគម្រោង​ផ្តល់​អាហាររូបត្ថម្ភ ​និងសម្ភារៈសម្រាប់កូនតាមម្តាយ ​និងស្រីមានផ្ទៃពោះ ជាជនជាប់ឃុំ នៅ​មណ្ឌល​អប់រំកែប្រែទី២ ​បានផ្តល់ផលប្រយោជន៍ដល់ជនជាប់ឃុំជាស្ត្រីមានផ្ទៃពោះ និងកូនតាម​ម្តាយ ​នឹង​សារសំខាន់នៃគម្រោងគឺជួយ​សម្រួលការលំបាកមួយចំនួន ដល់ជនជាប់ឃុំដែលជាស្ត្រីមាន​ផ្ទៃពោះ និងកូនតាមម្តាយ, ទោះបីមិនអាចឆ្លើយតបនឹងតម្រូវទាំងស្រុងក៏ដោយ ក៏អាចជួយកាត់បន្ថយ​ការ​លំបាក​បានមួយចំនួនដល់កូនតាមម្តាយ និងស្ត្រីមានផ្ទៃពោះជាជនជាប់ឃុំនៅមណ្ឌល​អប់រំ​កែប្រែទី២ នេះ។

ជុំវិញគម្រោងខាងលើ, ឯកឧត្តម ឧត្តមអគ្គានុរក្ស.១ ឆែម សាវុធ អគ្គនាយក នៃអគ្គនាយកដ្ឋាន​ពន្ធនាគារ បានថ្លែងនូវការសាទរចំពោះអង្កការ អ៊ីណូដូ ដែលសម្រេចបន្តគម្រោងរបស់ខ្លួន ដោយ​គម្រោងនេះ គឺជាការចង់បានរបស់អគ្គនាយកដ្ឋានពន្ធនា គារ ព្រោះកន្លងមកយើងសង្កេតឃើញថា អ៊ីណូដូ បានចូលរួមយ៉ាងសកម្ម ក្នុងការផ្តល់ផលប្រយោជន៍​ ពិសេសសម្រាប់កូនតាមម្តាយ និង​ស្ត្រីមាន​ផ្ទៃពោះដែលជាជនជាប់ឃុំ ​គឺស្របនិងគោលដៅអគ្គនាយកដ្ឋានពន្ធនាគារ ដែលនៅចំពោះ​មុខនេះ យើងនឹងប្រមូលជនជាប់ឃុំជាស្រ្តី ឬហៅថាទណ្ឌិត ​នឹងត្រូវផ្ទេរមកមណ្ឌលអប់រំកែប្រែទី២ ដើម្បីស្តារនីតិសម្បទាជូនដល់ពួកគាត់ ព្រោះនៅនេះ គឺមានរោងសិប្បកម្មខ្នាតតូច បច្ចុប្បន្នអគ្គ​នាយក​​ដ្ឋាន​កំពុង​ខិតខំពង្រីកបន្ថែមទៀត ដើម្បីឲ្យពួកគាត់ទទួលបានជំនាញ និងថវិការផ្តត់ផ្គង់​ជីវភាព ​ជាពិសេសការបង្កើតសិប្បកម្មនេះឡើង គឺជាការកាត់បន្ថយចំនួនអ្នកជាប់ឃុំនៅ​មន្ទីរ​ឃុំ​ឃាំងពេលថ្ងៃ ដែលមានចំនួនច្រើនផងដែរ៕អត្ថបទ៖ សុន រ៉ាឌី