កិច្ចប្រជុំប្រចាំឆ្នាំលើកទី១៧ នៃសេដ្ឋ​កិច្ច​រីកចម្រើន​យ៉ាង​ឆាប់​រហ័សថ្មី ដែលត្រូវបានគេស្គាល់យ៉ាងទូលំទូលាយថា ជាវេទិកា Davos រដូវក្តៅ (Summer Davos Forum) បានចាប់​ផ្ដើម​បើកនៅទីក្រុងឆ្នេរសមុទ្រ Dalian ភាគឦសានប្រទេសចិន នៅ​ថ្ងៃពុធ (ទី២៤ ខែមិថុនា ឆ្នាំ២០២៦) នេះ​ ដោយបានប្រមូលផ្តុំអ្នកចូលរួមជាង ១.៧០០នាក់ មកពីប្រទេស និងតំបន់ជាង ៩០ ដើម្បីពិភាក្សាអំពីអនាគតនៃសេដ្ឋកិច្ចពិភពលោក នវានុវត្តន៍បច្ចេកវិទ្យា និងកិច្ចសហប្រតិបត្តិការអន្តរជាតិ។

បើយោងតាមទីភ្នាក់ងារសារព័ត៌មានគ្រប់គ្រងដោយរដ្ឋ Xinhua បាន​ឲ្យ​ដឹង​ថា ការជួបជុំរយៈពេល ៣ថ្ងៃ ដែលរៀបចំដោយវេទិកាសេដ្ឋកិច្ចពិភពលោក កំពុងត្រូវបានធ្វើឡើងក្រោមប្រធានបទ «នវានុវត្តន៍ក្នុងទ្រង់ទ្រាយធំ» ហើយកើតឡើងនៅពេលដែលរដ្ឋាភិបាល និងក្រុម​ហ៊ុន​នានាទូទាំងពិភពលោក កំពុងតស៊ូជាមួយនឹងភាពមិនប្រាកដប្រជាផ្នែកសេដ្ឋកិច្ច ការផ្លាស់ប្តូរបច្ចេកវិទ្យាយ៉ាងឆាប់រហ័ស និងសក្ដានុពលភូមិសាស្ត្រនយោបាយដែលកំពុងប្រែប្រួល​។

អំឡុង​ពេល​ថ្លែងបើក​សម័យប្រជុំពេញអង្គ នាយករដ្ឋមន្ត្រីចិន Li Qiang បាននិយាយថា ការអភិវឌ្ឍដែលជំរុញដោយនវានុវត្តន៍ នៅតែជាមូលដ្ឋានគ្រឹះនៃភាពធន់ផ្នែកសេដ្ឋកិច្ចរយៈពេលវែងរបស់ប្រទេសចិន និងកំណើនប្រកបដោយចីរភាព។

នៅពេលចាប់ផ្តើមនៃផែនការ ៥ឆ្នាំ លើកទី១៥ របស់ប្រទេស ដែលគ្របដណ្តប់ឆ្នាំ២០២៦-២០៣០ លោក Li បាននិយាយថា សេដ្ឋកិច្ចចិនបានបង្ហាញពី «ស្ថិរភាព នវានុវត្តន៍ ភាពខ្លាំង​ក្លា និងការធ្វើសមាហរណកម្មជាមួយពិភពលោក»។ ជាមួយ​គ្នានេះ លោកបានចាត់ទុក​ថា ការសម្រេចបាន​សេដ្ឋកិច្ចដ៏រឹងមាំរបស់ប្រទេសចិន គឺដោយសារតែបរិយាកាសអភិវឌ្ឍន៍ដ៏ស្ថិរភាព និងការវិនិយោគនវានុវត្តន៍ជាបន្តបន្ទាប់៕