ភ្នំពេញ៖ ផ្លូវមួយខ្សែចេញពីចំណុចផ្លូវមិត្ដភាពកម្ពុជា-កូរ៉េ ស្ថិតនៅទីរួមស្រុកអង្គរធំ ឆ្ពោះទៅកាន់ស្រុកវ៉ារិន ស្រុកអង្គរជុំ ស្រុកវ៉ារិន ខេត្ដសៀមរាប បានរងការខូចខាតជាច្រើនឆ្នាំមក ដោយសាររថយន្ដដឹកថ្មដឹកដីឆ្លងកាត់។ ជាមួយគ្នានោះ ការដឹកជញ្ជូននេះ បណ្ដាលឲ្យហុយប៉ះពាល់ដល់លំនៅដ្ឋានប្រជាពលរដ្ឋ និងអ្នកដំណើរ ដោយសារក្រុមហ៊ុនដឹកជញ្ជូននោះមិនស្រោចទឹក។
ប្រជាពលរដ្ឋមួយចំនួននៅក្នុងស្រុកអង្គរធំ ខេត្ដសៀមរាប ដែលរស់នៅតាមផ្លូវនោះ បានត្អូញត្អែរថា ជារៀងរាល់ថ្ងៃពួកគាត់រងផលប៉ះពាល់ពីធូលីដីហុយចូលផ្ទះ និងពេលកំពុងធ្វើដំណើរ បណ្ដាលអោយប៉ះពាល់សុខភាពពួកគាត់ ជាពិសេសប៉ះពាល់ដល់សិស្សធ្វើដំណើរទៅសាលារៀន រួមប្រឡាក់សំលៀកបំពាក់ សក់ក្បាល និងធូលីហុយចូលភ្នែក ព្រោះតែមិនស្រោចទឹកផ្លូវ ខណៈដែលមានរថយន្ដរាប់រយគ្រឿងដឹកជញ្ជូនថ្ម ដីខ្សាច់ចេញពីតំបន់ភ្នំ ឆ្លងកាត់តាមបណ្ដោយផ្លូវនោះ។ ជាមួយគ្នានោះ ផ្លូវដែលរងការខូចខាតនេះ ដោយសារការដឹកជញ្ជូនលើសទំងន់ របស់ក្រុមហ៊ុនកិនថ្មដែលឆ្លងកាត់ទីនោះផងដែរ។
ពួកគាត់បានលើកឡើងដូចៗគ្នាថា កន្លងមកមានប្រជាពលរដ្ឋតវ៉ា អោយស្រោចទឹកជាច្រើនដងដែរ ប៉ុន្ដែខាងក្រុមហ៊ុនស្រោចទឹកបន្ដិចបន្ទួច ពោល គឺស្រោចទឹកផ្លូវឲ្យគេមើលឃើញថែខ្លួនធ្វើប៉ុណ្ណោះ។
ជាងនោះទៅទៀត ក្រុមហ៊ុនបានស្រោចទឹកតែនៅទីប្រជុំជនឃុំពាក់ស្នែងប៉ុណ្ណោះ។ អ្នកភូមិបានទទួចឲ្យអាជ្ញាធរ ជាពិសេសរាជរដ្ឋាភិបាលជំរុញឲ្យក្រុមហ៊ុនដឹកជញ្ជូនថ្ម ដឹកជញ្ជូនដីខ្សាច់ តាមផ្លូវនោះស្រោចទឹកជាប្រចាំ និងមានសំណើមជោគជាំ ដើម្បីកុំឲ្យដីហុយចូលលំនៅឋានពួកគាត់ និងស្រួលធ្វើដំណើរ និងជួយជួយជុលជុលផ្លូវនោះឡើងវិញ ព្រោះផ្លូវនោះមានសារៈសំខាន់ក្នុងការដឹកជញ្ជូនទំនិញកសិកម្ម។
ករណីនេះ លោក ឡុង រដ្ឋារក្ស អភិបាលស្រុកអង្គរធំ ខេត្ដសៀមរាប មានប្រសាសន៍ទទួលស្គាល់ថា ផ្លូវនោះពិតជាហុយធូលីមែន ព្រោះមានរថយន្ដក្រុមហ៊ុនកិនថ្មចំនួន ០៥ក្រុមហ៊ុន ធ្វើចរាចរណ៍លើផ្លូវនោះ ហើយកន្លងមក អាជ្ញាធរក៏បានដាក់បញ្ជាអោយក្រុមហ៊ុនធ្វើកិច្ចសន្យាស្រោចទឹកផ្លូវជាចាំផងដែរ ប៉ុន្ដែ ដោយសាររដូវក្ដៅពេកទើបមានដីហុយខ្លះៗ។ លោក ក៏បានស្នើរសុំទៅស្ថាប័នពាក់ព័ន្ធធ្វើការជួសជុលឡើងវិញ ប៉ុន្ដែមិនទាន់មានការឆ្លើយតបនៅឡើយ ។
បើតាមលោក ឡុង រដ្ឋារក្ស បានបញ្ជាក់ថា ផ្លូវនេះមានប្រវែងជាង ៤៦គីឡូម៉ែត្រ ចេញពីចំណុចផ្លូវមិត្ដភាពកម្ពុជា-កូរ៉េ ជិតទីរួមស្រុកអង្គរធំ ឆ្ពោះទីព្រំប្រទល់ស្រុកចំនួន ០៣រួមមានស្រុកអង្គរធំ ស្រុកអង្គរជុំ និងស្រុកវ៉ារិន។ ផ្លូវនេះ គម្រោងស្ថាបនារួចរាល់ម្ដងរួចមកហើយ កាលពីឆ្នាំ២០១២ និងឆ្នាំ២០១៣ ប៉ុន្ដែ រងការខូចខាតទៅវិញក្នុងរយៈពេលប៉ុន្មានឆ្នាំចុងក្រោយនេះ ដោយសារមានរថយន្ដធន់ធំធ្វើចរាចរណ៍ដឹកជញ្ជូនថ្ម ដីខ្សាច់ និងទំនិញផ្សេងៗជាដើម៕ អត្ថបទ៖ សាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
