កំពង់ចាម៖ ខណៈការបោះឆ្នោត ជ្រើសរើសក្រុមប្រឹក្សាឃុំសង្កាត់ កាន់តែខិតជិតមកដល់ហើយនោះ ឯកឧត្តមបណ្ឌិត ម៉ា ឈឿន តំណាងរាស្ត្រមណ្ឌលកំពង់ចាម និងជាប្រធានក្រុមការងារចុះជួយ​ស្រុកជើងព្រៃ បានជំរុញអាជ្ញាធរមូលដ្ឋាន ត្រូវខិតខំធ្វើអត្តសញ្ញាណប័ណ្ណជូនប្រជាពលរដ្ឋ ឲ្យបានទាន់ពេលវេលា ដើម្បីឲ្យពួកគាត់បានចូលរួមបោះឆ្នោតគ្រប់ៗគ្នា ។

ក្នុងឱកាសជួបសំណេះសំណាល បេក្ខជនឈរឈ្មោះបោះឆ្នោត ក្រុមប្រឹក្សាឃុំសង្កាត់ ស្រុកជើងព្រៃ នៅថ្ងៃទី២៧ ខែមេសា ឆ្នាំ២០២២ ឯកឧត្តម ម៉ា ឈឿន មានប្រសាសន៍ថា អាជ្ញាធរគ្រប់លំដាប់ថ្នាក់ និងកងកម្លាំងគ្រប់ប្រភេទ ត្រូវរក្សាឲ្យបាននូវសុខសន្តិភាព ទោះក្នុងតម្លៃណាក៏ដោយ រួមនឹង​ខិតខំ​យកចិត្តទុកដាក់ ​​អនុវត្តន៍នូវគោលនយោបាយភូមិឃុំ-សង្កាត់ ​មាន​សុវត្ថិភាព ​ដោយរួមគ្នាគិត រួមគ្នា​ធ្វើឲ្យមាន​ប្រសិទ្ធភាព ​ពិសេសក្នុងអំឡុងពេលយុទ្ធនាការ​ឃោសនា​រក​សំលេងឆ្នោត និងក្នុងអំឡុង​ពេល​បោះឆ្នោតក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ និងការបោះឆ្នោតជ្រើសតាំង​តំណាង​រាស្រ្ត អាណត្តិទី៨ ឆ្នាំ២០២៣ខាងមុខ ។

ឯកឧត្តម បន្តថា អាជ្ញាធរមូលដ្ឋាន និងនគរបាលប៉ុស្តិ៍ឃុំត្រូវយកចិត្តទុកដាក់បន្តទៀត ចំពោះប្រជា​ពលរដ្ឋ ដែលគ្មានអត្តសញ្ញាណប័ណ្ណ ត្រូវធ្វើឯកសារបញ្ជាក់ ដើម្បីអាចឲ្យពួកគាត់អាចមានសិទ្ធ​ចូលរួម​បោះឆ្នោត ​នាពេលខាងមុខនេះ​ ដែលកិច្ចការងារនេះ សម្រាប់ស្រុកជើងព្រៃ​បានធ្វើជូន​ប្រជាពលរដ្ឋ​រួច​ហើយនោះ ។

ឯកឧត្តមបណ្ឌិត ម៉ា ឈឿន ក៏បានជំរុញបន្ថែម​ដល់អាជ្ញាធរមូលដ្ឋាន ​ត្រូវខិតខំបម្រើប្រជាពលរដ្ឋ​ឲ្យបានល្អប្រសើរ ​មិនមែនតែពេលជិតបោះឆ្នោតនោះទេ​ គឺគ្រប់ពេលវេលាទាំងអស់ ។

ជាមួយគ្នានោះ ​ឯកឧត្តម អ៊ុន ចាន់ដា ​អភិបាលខេត្តកំពង់ចាម បានណែនាំដល់​បេក្ខជនឈរ​ឈ្មោះ​ទាំងអស់ ត្រូវត្រៀមខ្លូនចូលរួម​ប្រកួតប្រជែង​ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ​ឆ្នាំ២០២២ខាងមុខ ​ដែលស្រុកជើងព្រៃមានបេក្ខជន​មក​ពីគណបក្សចំនួន៧ បាន​ចូលរួមប្រកួតប្រជែង ៕អត្ថបទ បាន សុខរិទ្ធិ