លោក Mark Rutte អគ្គលេខាធិការអង្គការណាតូ (NATO) នឹងជួបជាមួយប្រធានាធិបតីអាមេរិក លោក Donald Trump នៅឯសេតវិមាន នា​ថ្ងៃពុធ (ទី២៤ ខែមិថុនា ឆ្នាំ២០២៦) ដោយស្វែងរកការបន្ធូរបន្ថយភាពតានតឹង ជុំវិញសង្គ្រាមអ៊ីរ៉ង់ និងការគំរាមកំហែងរបស់សហរដ្ឋអាមេរិក ក្នុងការបន្ថយ​ចំនួន​ទ័ព នៅអឺរ៉ុបមុនកិច្ចប្រជុំកំពូលមេដឹកនាំនៃ​អង្គការណាតូ នៅខែកក្កដា ក្នុង​ទីក្រុង Ankara ប្រទេស​ទួរគី។

លោក Trump ដែលជាអ្នករិះគន់អង្គការណាតូជាយូរមកហើយ​ ដោយ​បានហៅសម្ព័ន្ធភាពនេះថា ជា «ខ្លាក្រដាស» បានខឹងសម្បា ចំពោះការស្ទាក់ស្ទើររបស់អង្គការ​នេះ ក្នុងការគាំទ្រសហរដ្ឋអាមេរិក នៅក្នុងជម្លោះមជ្ឈិមបូព៌ា ឬជួយបើកច្រកសមុទ្រ Hormuz ឡើងវិញ បន្ទាប់ពី​ការវាយប្រហាររបស់សហរដ្ឋអាមេរិក-អ៊ីស្រាអែល លើអ៊ីរ៉ង់ កាលពី​ថ្ងៃទី២៨ ខែកុម្ភៈ បានរំខានដល់ផ្លូវដឹកជញ្ជូនប្រេងដ៏សំខាន់មួយ​នេះ​។

រដ្ឋមន្ត្រីក្រសួងការពារជាតិអាមេរិក លោក Pete Hegseth កាលពីសប្តាហ៍មុន បានរិះគន់​សម្ព័ន្ធមិត្តនេះ​ នៅឯកិច្ចប្រជុំអង្គការណាតូ និងបានប្រកាសពីការពិនិត្យឡើងវិញរយៈពេល ៦ខែនៃការដាក់ពង្រាយកងទ័ពរបស់សហរដ្ឋអាមេរិក នៅអឺរ៉ុប ដែលអាចបណ្តាលឲ្យ​មានការកាត់បន្ថយកងកម្លាំងអាមេរិកមួយចំនួន​។ នោះបានកើតឡើងបន្ទាប់ពីការសម្រេចចិត្តរបស់សហរដ្ឋអាមេរិក ក្នុងការបង្រួមសមត្ថភាពយោធារបស់សហរដ្ឋអាមេរិកដែលមានសម្រាប់សម្ព័ន្ធភាព ដោយ​ធ្វើឲ្យ​សមាជិកកំពុងជួប​ការ​លំបាក ក្នុង​ការបំពេញចន្លោះប្រហោងនេះ​។

តួនាទីចម្បងមួយរបស់លោក Rutte ចាប់តាំងពីការបោះឆ្នោតរបស់លោក Trump ក្នុងខែវិច្ឆិកា ឆ្នាំ២០២៤ គឺការដោះស្រាយអរិភាពរបស់ប្រធានាធិបតីរូប​នេះ ចំពោះសម្ព័ន្ធភាព និងការពារគ្រាដ៏តានតឹង រួមទាំងការជំរុញរបស់លោក Trump ក្នុង​ការ​ចង់គ្រប់គ្រងកោះ​ Greenland កុំ​ឲ្យ​វិវត្តទៅជាវិបត្តិយូរអង្វែង៕