រដ្ឋាភិបាលដាណឺម៉ាក កាលពីថ្ងៃអង្គារ (ទី២២ ខែមិថុនា ឆ្នាំ២០២៦) បាន​ឲ្យ​ដឹង​ថា ខ្លួននឹងចាប់ផ្តើមដាក់ពង្រាយទាហានជាប់​កំណែន​ទៅកាន់កោះ​ Greenland ជាទឹកដីស្វយ័តរបស់ប្រទេស​ដាណឺម៉ាកដែលប្រធានាធិបតីអាមេរិក លោក​ Donald Trump ចង់បាន។

រដ្ឋមន្ត្រីក្រសួងការពារជាតិ លោក Jeppe Bruus បានឆ្លើយតបទៅនឹងសំណួររបស់សភាថា៖ «ទាហានជាប់​កំណែន​នឹងត្រូវដាក់ពង្រាយរួមជាមួយទាហានអាជីព ហើយនឹងចូលរួមយ៉ាងពេញលេញ នៅក្នុងបេសកកម្មទាំងអស់»។

ប្រព័ន្ធផ្សព្វផ្សាយ TV2 បានរាយការណ៍ថា យោធាកំពុងពិចារណាដាក់ពង្រាយទាហានជាប់​កំណែន​ទៅកាន់ដែន​ដី Greenland ជាកន្លែងដែលខ្លួនបានពង្រឹងវត្តមាន ដើម្បីឆ្លើយតបទៅនឹងសម្ពាធពីសហរដ្ឋអាមេរិក​។

គួរបញ្ជាក់​ថា ភាពតានតឹងបានកើនឡើងនៅជុំវិញកោះ​ Greenland បន្ទាប់ពីលោក Trump បានបង្កើនការគំរាមកំហែងបញ្ចូលដែន​ដីរបស់​ដាណឺម៉ាកមួយ​នេះជា​ឧសម្ព័ន្ធ​ ​ដើម្បីការពារសន្តិសុខរបស់សហរដ្ឋអាមេរិក។ ប៉ុន្តែកាល​ខែមករា លោកបានដក​ការគំរាមកំហែងជាច្រើនសប្តាហ៍នេះ​វិញ​ ដោយប្រកាសថា លោកបានឈានដល់កិច្ចព្រមព្រៀង «ក្របខ័ណ្ឌ» ស្ដី​ពី​កោះ​ Greenland ជាមួយអគ្គលេខាធិការណាតូ តែ​មិនបានផ្តល់ព័ត៌មានលម្អិតឡើយ​៕