ប្រធានក្រុមចរចាអ៊ីរ៉ង់ លោក Mohammad Bagher Ghalibaf នៅ​ថ្ងៃពុធ (ទី២៤ ខែមិថុនា ឆ្នាំ២០២៦) នេះ បាន​លើកឡើង​ថា កិច្ចព្រមព្រៀង រវាងប្រទេស​អ៊ីរ៉ង់ និងសហរដ្ឋអាមេរិក ដើម្បីបញ្ចប់សង្គ្រាមមជ្ឈិមបូព៌ា គឺជា «សេចក្តីប្រកាសពីភាព​បរាជ័យរបស់អាមេរិក»។

ដោយសំដៅទៅលើអត្ថបទដែលបានបញ្ចប់តាមរយៈការសម្របសម្រួលរបស់ប្រទេស​ប៉ាគីស្ថាន លោក Ghalibaf បាននិយាយថា៖ «កិច្ច​ព្រម​ព្រៀង នៅ​ទីក្រុងអ៊ីស្លាម៉ាបាដ មិនមែនជាលទ្ធផលកើត​ចេញពី​សម្ពាធ និងការបង្ខិតបង្ខំនោះទេ ប៉ុន្តែជាលទ្ធផលនៃ​ការតស៊ូ និងសិទ្ធិ​​អំណាចរបស់ប្រជាជាតិអ៊ីរ៉ង់ដ៏ក្លាហាន» ។

លោកបានលើកឡើង​ទៀត​ថា «នោះហើយជាមូលហេតុដែលអនុស្សរណៈនៃការយោគយល់គ្នា (MOU) នៅ​ទីក្រុងអ៊ីស្លាម៉ាបាដ បានក្លាយជាសេចក្តីប្រកាសពីភាព​បរាជ័យរបស់អាមេរិក» ដោយបន្ថែមថា សន្តិសុខមជ្ឈិមបូព៌ា ត្រូវតែធានាដោយប្រទេសនានា នៅ​ក្នុងតំបន់នេះ​។

 លោក Ghalibaf ដែលក៏ជាប្រធានសភានៃប្រទេសរបស់លោកផងដែរនេះ បានសង្កត់ធ្ងន់​ថា៖ «យើងចាត់ទុកការដកកងកម្លាំងយោធាបរទេសចេញពីតំបន់នេះជាគោលដៅយុទ្ធសាស្ត្រ ពីព្រោះពួកគេមិនត្រឹមតែមិនបង្កើតសន្តិសុខប្រកបដោយចីរភាពប៉ុណ្ណោះទេ ប៉ុន្តែពួកគេក៏ជាប្រភពនៃអស្ថិរភាពផងដែរ»។

គួរ​បញ្ជាក់​ថា លោក Ghalibaf កំពុងថ្លែងសុន្ទរកថា នៅឯ​រដ្ឋធានីបាគូរបស់ប្រទេសអាស៊ែបៃហ្សង់ នា​ថ្ងៃពុធនេះ​ ដែលត្រូវបានចាក់ផ្សាយតាមកញ្ចក់​ទូរទស្សន៍របស់​អ៊ីរ៉ង់៕