ក្រសួងការបរទេសប៉ាគីស្ថាន នៅ​ថ្ងៃពុធ (ទី២៤ ខែមិថុនា ឆ្នាំ២០២៦) នេះ បាន​ឲ្យដឹង​ថា កិច្ចចរចាកម្រិតបច្ចេកទេស រវាងសហរដ្ឋអាមេរិក និងអ៊ីរ៉ង់ នឹងចាប់ផ្ដើម​ឡើង​វិញ នៅសប្តាហ៍ក្រោយ បន្ទាប់ពីបាន​ផ្អាកបណ្ដោះអាសន្ន។

អ្នកនាំពាក្យក្រសួងការបរទេស លោក Tahir Andarabi បានប្រាប់អ្នកសារ​ព័ត៌មាននៅទីក្រុងអ៊ីស្លាម៉ាបាដ​ថា៖ «កិច្ចចរចាបច្ចេកទេស នឹងចាប់​ផ្ដើម​ឡើងវិញ​នៅសប្តាហ៍ក្រោយ។ នេះគឺជាការឈប់សម្រាក​បន្តិច ហើយកិច្ចចរចានឹងចាប់ផ្ដើម​ឡើង​វិញ»។

យោងតាមលោក Andrabi បាន​ឲ្យ​ដឹង​ទៀត​ថា កិច្ចចរចាបច្ចេកទេស ត្រូវបានគេរំពឹងថា នឹងចាប់ផ្តើមឡើងវិញនៅដើមសប្តាហ៍ក្រោយ បន្ទាប់ពីមាន​ការពិភាក្សាជាច្រើនម៉ោង រវាងអ៊ីរ៉ង់ និងសហរដ្ឋអាមេរិក នៅទីក្រុង Burgenstock របស់​ប្រទេសស្វីស កាលពីថ្ងៃចន្ទ។

លោក Andrabi បានបន្ត​ទៀត​ថា ក្រុមបច្ចេកទេសមកពីប្រទេសសម្រុះសម្រួល គឺប៉ាគីស្ថាន និងកាតា នឹងបន្តធ្វើការជាមួយសមភាគីសហរដ្ឋអាមេរិក និងអ៊ីរ៉ង់ នៅក្នុងសប្តាហ៍ខាងមុខ ដើម្បីគាំទ្រដល់ការអនុវត្តអនុស្សរណៈនៃការយោគយល់គ្នា (MOU) នៅទីក្រុងអ៊ីស្លាម៉ាបាដ ដែលមានគោលបំណងឈានដល់កិច្ចព្រមព្រៀងសន្តិភាពចុងក្រោយក្នុងរយៈពេល ៦០​ថ្ងៃ។

លោកបាន​បន្ថែម​​ថា MOU ដែលបានចុះហត្ថលេខាដោយប្រធានាធិបតីសហរដ្ឋអាមេរិក និងអ៊ីរ៉ង់ កាលពីសប្តាហ៍មុន និងកិច្ចប្រជុំបន្ទាប់មក នៅស្វីស បានគូសបញ្ជាក់ពីសារៈសំខាន់នៃការសន្ទនា និងការទូតជាឧបករណ៍ដ៏មានប្រសិទ្ធភាព ដើម្បី​ដោះស្រាយជម្លោះ និងកាត់បន្ថយភាពតានតឹង៕