ស្ទឹងត្រែង៖ ឯកឧត្តម វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងជាប្រធានគណៈកម្មាធិការទទួលបន្ទុកកិច្ចការព្រំដែន បានអញ្ជើញចុះសួរសុខទុក្ខកងកម្លាំងយោធា និងត្រួតពិនិត្យការដ្ឋានស្ថាបនាផ្លូវខ្សែក្រវាត់ព្រំដែនកម្ពុជា-ឡាវ ដែលបានកសាងដោយកងឯកភាពស្ថាបនាថ្នល់-ស្ពាន លេខ៧១៥ និងកងឯកភាពស្ថាបនាថ្នល់លេខ៧១៧ នៃបញ្ហាការដ្ឋានវិស្វកម្ម អគ្គបញ្ជាការ លើភូមិសាស្រ្ត ស្រុកសៀមប៉ាង ខេត្តស្ទឹងត្រែង។

ឧត្តមសេនីយ៍ត្រី សុខ សុផល បានរាយការណ៍ជូនគណៈប្រតិភូជ្រាបអំពីសកម្មភាព និងលទ្ធផល នៃការស្ថាបនាផ្លូវខ្សែក្រវាត់ព្រំដែនកម្ពុជា-ឡាវ លើភូមិសាស្ត្រស្រុកសៀមប៉ាង ខេត្តស្ទឹងត្រែង រួមមានការ ដ្ឋានផ្លូវ ចំនួន០៣ខ្សែ រួមទាំងសំណង់មុខទឹក លើខ្សែផ្លូវមេ បន្តពីPk17+000 ដល់អូរអាល័យ ប្រវែង ១៧គីឡូម៉ែត្រ ផ្លូវខ្នែង បំបែកពីផ្លូវមេ-អូរតាង៉ាវលើ ប្រវែង៨គីឡូម៉ែត្រ ផ្លូវមេ បន្តពីផ្លូវបំបែកជាមួយផ្លូវខ្នែង ឆ្ពោះទៅព្រលាន អូតាង៉ាវ ប្រវែង៣គីឡូម៉ែត្រ។

ឯកឧត្តម វ៉ា គឹមហុង ថ្លែងកោតសរសើរ និងវាយតម្លៃខ្ពស់ចំពោះសកម្មភាពស្ថាបនាផ្លូវ និងសំណង់ មុខទឹក​របស់មេបញ្ជាការ មេបញ្ជាការរង កងឯកភាព ទាំង២ ​និងនាយទាហាន នាយទាហានរង ពលទាហានទាំងអស់ ដែលក្នុងរយៈពេលកន្លងមក ​ទោះបីជាស្ថិតក្នុងបរិបទនៃជំងឺកូវីដ-១៩យ៉ាងណា​ក៏ដោយ ក៏កងឯកភាពទាំងពីរ បានយកចិត្តទុកដាក់ ពុះពារជម្នះរាល់ឧបសគ្គ ការលំបាក​គ្រប់បែបយ៉ាង ខិតខំប្រឹងប្រែង ធ្វើការស្ថាបនាផ្លូវខ្សែក្រវាត់ព្រំដែនកម្ពុជា-ឡាវ លើ​ភូមិសាស្ត្រ ស្រុកសៀមប៉ាង ​ខេត្តស្ទឹងត្រែង​ រហូតមកដល់ថ្ងៃនេះ សម្រេចបានលទ្ធផល​យ៉ាងច្រើន​គួរជាទីមោទនៈបំផុត។

ឯកឧត្តម បានបញ្ជាក់ថា ​សមិទ្ធផលផ្លូវខ្សែរក្រវ៉ាត់ព្រំដែន និងបង្គោលខណ្ឌសីមាទាំងអស់នេះ ជា​មរតកប្រវត្តិសាស្រ្ត ​មានតម្លៃជាយុទ្ធសាស្ត្រមិនអាចកាត់ថ្លៃ ហើយបានសំម្រេចចេញ​ជា​រូបរាង​យ៉ាងល្អរឹងមាំ ក្រោមម្លប់សន្តិភាព ​ក្នុងការអនុវត្ត​នយោបាយកសាងព្រំដែន ​ដែល​សម្ដេចតេជោ ហ៊ុន សែន ​នាយករដ្ឋមន្រ្តី បានដាក់ចេញ (កសាងខ្សែបន្ទាត់ព្រំដែន​ ជាមួយប្រទេសជិតខាង ជា​ខ្សែព្រំដែនសន្តិភាព មិត្តភាព សហប្រតិបត្តិការ ​និងអភិវឌ្ឍន៍​ ប្រកបដោយចីរភាព) ដើរទន្ទឹមនឹង​អនុវត្តគោលនយោបាយ ​កសាងខឿន​ ការពារប្រទេសជាតិជូនប្រជាពលរដ្ឋ៕ អត្ថបទ៖ មាស ផល្លា