រដ្ឋមន្ត្រីការបរទេសប៉ូឡូញ លោក Radoslaw Sikorski បាននិយាយនៅថ្ងៃពុធ (ទី២៤ ខែមិថុនា ឆ្នាំ២០២៦) នេះថា រុស្ស៊ីអាចនឹងកំពុងរៀបចំប្រតិបត្តិការទង់ក្លែងក្លាយ (ការវាយប្រហារ​ទម្លាក់កំហុស​ទៅ​លើ​អ្នកដទៃ​) ក្រោយ​មាន​​ការគំរាមកំហែងសងសឹករបស់ប្រធានាធិបតី លោក​ Vladimir Putin ប្រឆាំងនឹងប្រទេសអឺរ៉ុបដែលលោកបានចោទប្រកាន់ថា ជាប់ពាក់ព័ន្ធនឹងការវាយប្រហារដោយយានដ្រូន លើទឹកដីរុស្ស៊ី។

លោក Putin បាននិយាយថា រុស្ស៊ីនឹងឆ្លើយតប ប្រសិនបើយានដ្រូន​ត្រូវបានបាញ់ដាក់​គោលដៅរបស់រុស្ស៊ីចេញ​ពីប្រទេសនៅ​អឺរ៉ុប។ លោក Putin បាននិយាយកាលពីថ្ងៃអង្គារថា៖ «ពួកគេដឹង​ថា ការសងសឹកនឹងកើតឡើង។ ខ្ញុំគិតថា មនុស្សគ្រប់គ្នា​ដឹង​ពីរឿងនេះ ឬគួរតែបាន​ដឹង​ពីវា»។

លោក Sikorski បានឆ្លើយតប ដោយទាញ​យកហេតុការណ៍​​ស្របគ្នាជាមួយនឹងប្រតិបត្តិការទង់ក្លែងក្លាយដ៏ល្បីល្បាញ​បំផុតមួយ​ ក្នុងប្រវត្តិសាស្ត្រអឺរ៉ុប។ លោក Sikorski បានសរសេរនៅលើវេទិកាបណ្ដាញ​សង្គម​ X ថា៖ «នេះស្តាប់ទៅដូចជាការប្រកាសពីការបង្កហេតុ​។ ខ្ញុំរំពឹងថា នឹងមានការវាយប្រហារលើទឹកដីរុស្ស៊ី ក្រោមប្រតិបត្តិការ​ទង់ក្លែងក្លាយ ដែលបន្ទាប់​មក​លោក Putin នឹងឆ្លើយតប»។

លោកបានបន្ថែមថា៖ «ខ្ញុំសូមរំលឹកអ្នកទាំងអស់គ្នា​ថា នៅខែសីហា ឆ្នាំ១៩៣៩ ក្រុម Abwehr បានធ្វើការវាយប្រហាររបស់ប៉ូឡូញ លើស្ថានីយ៍វិទ្យុនៅទីក្រុង​ Gleiwitz ដើម្បីបង្កើតលេស​បង្ក​​សង្គ្រាម»។

ការកត់សម្គាល់របស់រដ្ឋមន្ត្រីការបរទេសរូប​នេះ គឺ​សំដៅទៅលើឧប្បត្តិហេតុទីក្រុង Gleiwitz ដែលជាប្រតិបត្តិការរបស់ក្រុម​ណាហ្ស៊ីអាល្លឺម៉ង់ ដោយ​នៅពេល​នោះ​ភ្នាក់ងារអាល្លឺម៉ង់បានក្លែងបន្លំជាអ្នកវាយប្រហារប៉ូឡូញមួយរយៈខ្លី មុនពេលផ្ទុះឡើង​នូវ​សង្គ្រាមលោកលើកទី២។ ព្រឹត្តិការណ៍នេះ ត្រូវបានប្រើប្រាស់ដោយលោក Adolf Hitler ជាបន្តបន្ទាប់ ជាផ្នែកមួយនៃយុត្តិកម្ម ដើម្បី​ឈ្លានពានប្រទេសប៉ូឡូញ នៅថ្ងៃទី១ ខែកញ្ញា ឆ្នាំ១៩៣៩៕