​

នៅថ្ងៃពុធ (ទី២៤ ខែមិថុនា ឆ្នាំ២០២៦) នេះ ប្រទេសបារាំង បានប្រកាសពីករណីជំងឺ Ebola ដែលត្រូវបានបញ្ជាក់​ដំបូង​ នៅលើទឹកដីរបស់ខ្លួន ដោយបុគ្គល​​ត្រូវបាន​កំណត់អត្តសញ្ញាណ​ថា ជា​​​វេជ្ជបណ្ឌិតម្នាក់ដែលត្រឡប់មកពីសាធារណរដ្ឋប្រជាធិបតេយ្យកុងហ្គោ ជា​ទី​ដែលកំពុងមាន​ការ​ប្រយុទ្ធប្រឆាំងជាមួយ​ការផ្ទុះឡើងដ៏ធំនៃជំងឺនេះ​។

នេះគឺជាករណីដំបូងនៃជំងឺដ៏​កំណាច​នេះ​​ ដែលត្រូវបានកំណត់អត្តសញ្ញាណនៅខាងក្រៅទ្វីបអាហ្វ្រិក ក្នុងអំឡុងពេលនៃការផ្ទុះឡើងបច្ចុប្បន្ន​នេះ​ ជា​ជំងឺ​ដែលក៏បានប៉ះពាល់ផង​ដែរដល់ប្រទេសអ៊ូហ្គង់ដា។ វាក៏ជាលើកដំបូងផង​ដែរ​ដែលករណីជំងឺ​អេបូឡាត្រូវបានរកឃើញនៅក្នុងប្រទេសបារាំង។ កាលពី​ឆ្នាំ២០១៤ ក្នុងអំឡុងពេលនៃការផ្ទុះឡើងនូវ​ជំងឺនេះ នៅតំបន់​អាហ្វ្រិកខាងលិច អ្នកជំងឺ ២នាក់ ត្រូវបានដឹកបញ្ជូន​ទៅប្រទេសបារាំង ប៉ុន្តែពួកគេត្រូវបានធ្វើរោគវិនិច្ឆ័យ នៅបរទេស។

សេចក្តីថ្លែងការណ៍មួយ បាន​ឲ្យដឹង​ថា ក្រសួងសុខាភិបាល «សូម​បញ្ជាក់នៅថ្ងៃនេះ អំពីការកំណត់អត្តសញ្ញាណករណីវិជ្ជមានដំបូងនៃវីរុសជំងឺ Ebola នៅលើទឹកដីជាតិ»។ ដោយត្រូវបាន​ទាក់ទង​ដោយសារព័ត៌មាន AFP ក្រសួង​បាន​ឲ្យ​ដឹង​ទៀត​ថា ករណីនេះត្រូវបានកំណត់អត្តសញ្ញាណ នៅដីគោកប្រទេសបារាំង​។ ក្រសួងបានបន្ថែម​ថា វេជ្ជបណ្ឌិតរូបនេះត្រូវបានដាក់ឲ្យ​នៅដាច់ដោយឡែកពីគេ​ នៅពេលចូល​មកដល់ប្រទេសបារាំង សូម្បីតែមុនពេលជំងឺនេះត្រូវបានកំណត់អត្តសញ្ញាណជាផ្លូវកា។

គួរបញ្ជាក់​ថា ការផ្ទុះឡើងនៃជំងឺ Ebola លើកទី១៧ របស់កុងហ្គោ ត្រូវបានប្រកាសកាល​ពី​ថ្ងៃទី១៥ ខែឧសភា បន្ទាប់ពីមានការស្លាប់ជាច្រើនដែលមិនអាចពន្យល់បាន នៅក្នុងខេត្ត Ituri។ វីរុសប្រភេទ Bundibugyo ដែលបង្កឲ្យមានការផ្ទុះឡើងនេះ បច្ចុប្បន្នមិនទាន់មានវ៉ាក់សាំង ឬការព្យាបាលដែលត្រូវបានអនុម័តនៅឡើយទេ៕