បណ្ដាខេត្ត នៅ​ភាគខាងជើង និងភាគ​កណ្តាលរបស់​ប្រទេសវៀតណាម ត្រូវបានគេរំពឹងថា នឹងប្រឈមជាមួយ​នឹងរលកកម្ដៅក្ដៅ​ខ្លាំង​ នៅសប្តាហ៍នេះ ដោយសីតុណ្ហភាពត្រូវបានព្យាករថា នឹងលើសពី ៤០ អង្សាសេ នៅក្នុងតំបន់មួយចំនួន។

មជ្ឈមណ្ឌលជាតិ សម្រាប់ការព្យាករឧតុនិយម (NCHMF) បានឲ្យ​ដឹង​ថា រលកកម្ដៅនឹងឡើងដល់កម្រិតខ្ពស់​បំផុត នៅពាក់កណ្តាលសប្តាហ៍នេះ​។

អំឡុងសប្តាហ៍នេះ សីតុណ្ហភាពអតិបរិមានៅទូទាំងតំបន់ភាគខាងជើង ត្រូវបានគេព្យាករថា នឹងកើនឡើងយ៉ាងខ្លាំងដល់ចន្លោះពី ៣៧ ទៅ ៣៩អង្សាសេ ដោយតំបន់ភ្នំ និងទីក្រុងមួយចំនួន ទំនងជាលើសពី ៣៩ អង្សាសេ។

អ្នកឧតុនិយម ព្យាករថា កម្ដៅក្ដៅ​ខ្លាំងបំផុត នៅភាគខាងជើង នឹងមាន​នៅក្នុងខេត្ត Hung Yen និង​ Ninh Binh ព្រម​ទាំង​ទីក្រុងហាណូយផង​ដែរ​។ ទន្ទឹមនឹងនេះ តំបន់ភាគ​កណ្តាលត្រូវបានគេរំពឹងថា នឹងជួប​ប្រទះ​ជាមួយ​ស្ថានភាពកាន់តែអាក្រក់ទៅៗ។ ចន្លោះពីថ្ងៃទី២២ ដល់ទី​២៥ ខែមិថុនា តំបន់នេះត្រូវបានគេរំពឹងថា នឹង​ជួប​ប្រទះ​រយៈពេលនៃកម្ដៅក្ដៅ​ខ្លាំង រហូត​កាន់​តែ​ខ្លាំងមិន​ធម្មតា។

តំបន់ដែលលាតសន្ធឹងពីខេត្ត Thanh Hoa រហូត​ដល់​ទី​ក្រុង​ Hue ត្រូវបានគេរំពឹងថា នឹងក្លាយជាតំបន់ក្តៅបំផុតរបស់ប្រទេស ដោយមានសីតុណ្ហភាពខ្ពស់បំផុតនៅពេលថ្ងៃ ចាប់ពី ៣៨ ទៅ ៤០អង្សាសេ។ សីតុណ្ហភាពនៅតំបន់ភ្នំភាគខាងលិចនៃតំបន់ភាគ​កណ្តាល អាចលើសពី ៤០ អង្សាសេ៕