ភ្នំពេញ ៖ នៅព្រឹកថ្ងៃពុត ១១រោច ខែចេត្រ ឆ្នាំខាល ចត្វាស័ក ព.ស២៥៦៥ ត្រូវនឹងថ្ងៃទី២៧ ខែមេសា ឆ្នាំ២០២២នេះ ឯកឧត្តម ហែម ពិសិដ្ឋ អភិបាលរងខេត្តស្វាយរៀង តំណាងឯកឧត្តម ម៉ែន វិបុល អភិបាលខេត្តបានអញ្ជើញដឹកនាំកិច្ចប្រជុំពិភាក្សានិងផ្តល់យោបល់ផ្សេងៗ លើការងារគ្រប់គ្រងកំពង់ផែអូសស្មាច់និងការត្រៀមរៀបចំទីលានកំពង់ផែសម្រាប់លើកដាក់ និងដឹកជញ្ជូនទំនិញ ស្ថិតនៅភូមិចុងព្រែក សង្កាត់ស្វាយរៀង ក្រុងស្វាយរៀង។

កិច្ចប្រជុំនេះក៏មានការអញ្ជើញចូលរួមពីលោកអភិបាលក្រុងស្វាយរៀង លោកប្រធានមន្ទីរ-អង្គភាពពាក់ព័ន្ធ លោកនាយក លោកនាយករងទីចាត់ការ/អង្គភាពចំណុះសាលាខេត្តមួយចំនួនទៀត។

សូមជម្រាបជូនថា នាពេលកន្លងមកនេះ អាស្រ័យដោយស្ថានភាពផ្ទៃទឹកកាន់តែរាក់ពីមួយឆ្នាំទៅមួយឆ្នាំ បានបង្កការលំបាកយ៉ាងខ្លាំងសម្រាប់ការចេញចូលទូក ឬកាណូតធំៗ ជាហេតុធ្វើឲ្យការដឹកជញ្ជូនទំនិញមានការថយចុះ នាំឲ្យកំពង់ផែនេះ ពុំសូវមានសកម្មភាពនោះឡើយ។ប៉ុន្តែដោយមើលឃើញពីសារៈសំខាន់នៃការដឹកជញ្ជូនតាមផ្លូវទឹក និងដើម្បីទាញនូវផលប្រយោជន៍ពីកំពង់ផែនេះឲ្យអស់សក្ដានុពលឡើងវិញ ជាពិសេសក្នុងគោលដៅជំរុញការអភិវឌ្ឍប្រព័ន្ធដឹកជញ្ជូនតាមផ្លូវទឹកឲ្យមានដំណើរការល្អតាមផ្លូវទឹកទៅមកជាមួយប្រទេសវៀតណាម ក៏ដូចជាលើកស្ទួយកំណើនសេដ្ឋកិច្ចជាតិ កាត់បន្ថយភាពក្រីក្ររបស់ប្រជាពលរដ្ឋ និងការអភិវឌ្ឍខេត្តឲ្យបានកាន់តែរីកចម្រើនថែមទៀត៕​ អត្ថបទ ៖ សុខរិទ្ធ