ប្រទេសចិនបាន​លើក​ឡើង​នៅ​ថ្ងៃពុធ (ទី២៤ ខែមិថុនា ឆ្នាំ២០២៦)​ នេះថា អនុស្សរណៈនៃការយោគយល់គ្នា​ទីក្រុង​អ៊ីស្លាម៉ាបាដ (Islamabad MOU) រវាងសហរដ្ឋអាមេរិក និងអ៊ីរ៉ង’ បានបញ្ជូន​ «សញ្ញាវិជ្ជមាន» ហើយគួរតែត្រូវបានការពារ និងអនុវត្តរួមគ្នា។

អ្នកនាំពាក្យក្រសួងការបរទេស លោក Guo Jiakun បានប្រាប់អ្នកសារព័ត៌មាននៅទីក្រុងប៉េកាំងថា ប្រទេសចិន «គាំទ្រ» ការសន្ទនា និងការចរចា ដើម្បី​ដោះស្រាយបញ្ហា ក្នុងតំបន់ និងការ​ខ្វែង​គំនិត​គ្នា រវាងភាគីនានា ហើយ​ «ប្រឆាំងនឹងការគំរាមកំហែង ឬការប្រើប្រាស់កម្លាំង»។

លោកបានបន្ថែមថា ទីក្រុងប៉េកាំង «តែងតែគាំទ្រជំហរយុត្តិធម៌ គាំទ្រកិច្ចប្រឹងប្រែងទាំងអស់ដែលអំណោយផលដល់សន្តិភាព គាំទ្រភាគីអ៊ីរ៉ង់ ក្នុងការការពារអធិបតេយ្យភាព សន្តិសុខ និងទឹកដី និងសេចក្តីថ្លៃថ្នូរជាតិ ហើយ​គាំទ្រអ៊ីរ៉ង់ក្នុងការកែលម្អទំនាក់ទំនងរបស់ខ្លួនជាមួយបណ្ដា​រដ្ឋឈូងសមុទ្រ និងប្រទេសក្នុងតំបន់»។

គួរបញ្ជាក់ថា អ៊ីរ៉ង់ និងសហរដ្ឋអាមេរិក បានប្រកាសកាលពី​ថ្ងៃទី១៤ ខែមិថុនាថា ភាគីទាំង២ បានឈានដល់ MOU ចំនួន ១៤ចំណុច ដែលសម្របសម្រួលដោយប៉ាគីស្ថាន ដោយមាន​គោលបំណងបញ្ចប់សង្គ្រាម និងដោះស្រាយជម្លោះដែលនៅសេសសល់តាមរយៈការសន្ទនា និងការចរចា។

អនុស្សរណៈនេះ ដែលត្រូវបានគេស្គាល់ថា ជាអនុស្សរណៈនៃការយោគយល់គ្នា​ទីក្រុង​អ៊ីស្លាម៉ាបាដ បានចូលជាធរមានកាល​ពី​ថ្ងៃទី១៨ ខែមិថុនា បន្ទាប់ពីត្រូវបានចុះហត្ថលេខាតាមប្រព័ន្ធ​អេឡិចត្រូនិកដោយប្រធានាធិបតីអ៊ីរ៉ង់ លោក Masoud Pezeshkian និងប្រធានាធិបតីអាមេរិក លោក Donald Trump៕