ប្រធានសភាអ៊ីរ៉ង់ លោក Mohammad Bagher Qalibaf បាននិយាយនៅ​ថ្ងៃពុធ (ទី​២៤ ខែមិថុនា ឆ្នាំ​២០២៦) នេះ​ថា ការបញ្ចប់សង្គ្រាម នៅប្រទេសលីបង់ គឺមានសារៈសំខាន់ ចំពោះទីក្រុងតេអេរ៉ង់ ដូចជាការបញ្ចប់សង្គ្រាម នៅអ៊ីរ៉ង់ដែរ។ នេះបើយោងតាមទីភ្នាក់ងារសារព័ត៌មាន ISNA។

អំឡុង​ពេល​ថ្លែងនៅក្នុងសម័យប្រជុំលើកទី២០ នៃសន្និសីទសហភាពសភារបស់​រដ្ឋសមាជិកអង្គការសហប្រតិបត្តិការឥស្លាម (PUIC) នៅទីក្រុងបាគូ ប្រទេសអាស៊ែបៃហ្សង់ លោក Qalibaf បាននិយាយថា៖ «បទឈប់បាញ់ និងការបញ្ចប់សង្គ្រាម នៅប្រទេសលីបង់ គឺមានសារៈសំខាន់សម្រាប់យើង ដូចបទឈប់បាញ់ និងការបញ្ចប់សង្គ្រាម នៅអ៊ីរ៉ង់ដែរ»។

ជាមួយ​គ្នា​នេះ លោក​បានលើកឡើង​ទៀត​​ថា ប្រទេស​អ៊ីរ៉ង់​បាន​ត្រៀម​ខ្លួន​រួច​ជា​ស្រេច ​ដើម្បី​ពង្រីក​កិច្ច​សហប្រតិបត្តិការ​ជាមួយ​ប្រទេសឥស្លាម​ទាំងអស់​ ដោយ​ផ្អែក​លើ​ការ​គោរព​គ្នា​ទៅ​វិញ​ទៅ​មក ការ​មិន​ជ្រៀតជ្រែក​ក្នុង​កិច្ចការ​ផ្ទៃក្នុង ភាព​ជា​អ្នក​ជិត​ខាង​ល្អ និង​​ផលប្រយោជន៍​រួម។

សន្និសីទរយៈពេល ៤ថ្ងៃ ដែលបានចាប់ផ្តើមកាលពី​ថ្ងៃចន្ទ បានប្រមូលផ្តុំគណៈប្រតិភូជាង ៤០០នាក់ មកពីរដ្ឋជាសមាជិកនៃអង្គការសហប្រតិបត្តិការឥស្លាម (OIC)។

សការកត់សម្គាល់របស់លោក Qalibaf បានកើតឡើងនៅពេលដែលអ៊ីរ៉ង់បន្តការចរចាជាមួយសហរដ្ឋអាមេរិក ក្រោមក្របខ័ណ្ឌនៃអនុស្សរណៈយោគយល់គ្នាអ៊ីស្លាម៉ាបាដ (Islamabad MOU) ដែលរួមមាន​លក្ខខណ្ឌទាក់ទងនឹងការបញ្ចប់ប្រតិបត្តិការយោធា នៅទូទាំងតំបន់ រួមទាំងនៅ​ប្រទេសលីបង់ផងដែរ៕