ក្រសួងការបរទេសចិននិយាយនៅថ្ងៃពុធនេះថា ជនជាតិជប៉ុន ២នាក់ ត្រូវបានឃាត់ខ្លួន ដោយអនុលោមតាមច្បាប់ សម្រាប់ការបំពានបទប្បញ្ញត្តិរបស់ចិន ក្នុងករណីរត់ពន្ធ ។

ថ្លែងនៅក្នុងសន្និសីទសារព័ត៌មាន អ្នកនាំពាក្យក្រសួងការបរទេសចិនលោក Guo Jiakun និយាយថា ទីក្រុងប៉េកាំង បានជូនដំណឹងទៅកាន់ទីក្រុងតូក្យូ និងជំរុញឲ្យពួកគេធានាថា ពលរដ្ឋ និងក្រុមហ៊ុនរបស់ពួកគេនៅក្នុងប្រទេសចិន អនុលោមតាមច្បាប់ក្នុងស្រុក ។

ការចាប់ខ្លួននេះ អាចនឹងធ្វើឲ្យទំនាក់ទំនងកាន់តែជាប់គាំងបន្ថែមទៀត រវាងប្រទេសសេដ្ឋកិច្ចធំបំផុតទាំង ២ប្រចាំអាស៊ី ដែលកាន់តែធ្ងន់ធ្ងររួចទៅហើយ ចាប់តាំងពីសេចក្តីអត្ថាធិប្បាយរបស់នាយករដ្ឋមន្រ្តីជប៉ុនលោកស្រី Sanae Takaichi ស្តីពីកោះតៃវ៉ាន់ បង្កឲ្យមានជម្លោះធំជាមួយទីក្រុងប៉េកាំង កាលពីចុងឆ្នាំមុន ។

លោក Minoru Kihara គឺជារដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីជប៉ុននិយាយនៅក្នុងសន្និសីទសារព័ត៌មាននាថ្ងៃពុធនេះថា ចិនបានជូនដំណឹងមកកាន់ពួកគេថា ជនជាតិជប៉ុន ២នាក់ ត្រូវបានឃាត់ខ្លួននៅទីក្រុងកំពង់ផែ Dalian កាលពីថ្ងៃទី ១៨ ខែឧសភា ពីបទសង្ស័យថាបានបំពានច្បាប់លើទំនិញរត់ពន្ធ ដែលហាមឃាត់ពីការនាំចូល ឬការនាំចេញ ។

លោកបន្តថា ជនជាតិជប៉ុនម្នាក់ទៀត ត្រូវបានឃាត់ខ្លួនក្នុងហេតុផលតែមួយ កាលពីថ្ងៃទី ២៥ ខែឧសភា ។

សូមបញ្ជាក់ថា ករណីចាប់ខ្លួនជនជាតិជប៉ុននៅលើទឹកដីចិន បានក្លាយជាបញ្ហាច្រំដែល ចាប់តាំងពីទីក្រុងប៉េកាំង អនុម័តច្បាប់ប្រឆាំងចារកម្មធំទូលាយកាលពីឆ្នាំ ២០១៤ ៕