បែលហ្ស៊ិកបានចេញការព្រមាន​អំពីកម្ដៅ​ទូទាំងប្រទេស នៅថ្ងៃពុធ (ទី២៤ ខែមិថុនា ឆ្នាំ២០២៦) នេះ ខណៈដែលរលកកម្ដៅ​ក្ដៅ​ខ្លាំងកំពុងគ្របដណ្ដប់ប្រទេសនេះ​ ដែលជំរុញឲ្យ​ប្រតិបត្តិករផ្លូវដែកជាតិ SNCB លុបចោលដំណើរការ​រថភ្លើងប្រហែល ១០០គ្រឿង​​ ក្នុង ១ថ្ងៃ។

ការ​ជូន​ដំណឹងនេះត្រូវបានដំណើរការ​ ក្រោមផែនការកម្ដៅ​ជាតិ បន្ទាប់ពីមាន​កិច្ចប្រជុំ រវាងមជ្ឈមណ្ឌលវិបត្តិជាតិ ក្រសួងសុខាភិបាល វិទ្យាស្ថានឧតុនិយមរាជវង្ស (RMI) និងភ្នាក់ងារពាក់ព័ន្ធផ្សេងទៀត។

ទីភ្នាក់ងារសារព័ត៌មាន Belga បានរាយការណ៍ថា ក្រុមហ៊ុន SNCB បានប្រកាសថា រថភ្លើងប្រហែល ១០០គ្រឿង​ នឹងត្រូវបានផ្អាក​ជារៀងរាល់ថ្ងៃ ចាប់ពីថ្ងៃពុធ ដល់ថ្ងៃសុក្រ ដោយសារតែសីតុណ្ហភាពក្ដៅ​ខ្លាំង។

ប្រតិបត្តិករផ្លូវដែកនេះ បានបញ្ជាក់​​ថា វិធានការនេះ គឺចាំបាច់ ដើម្បីធានាបាននូវផាសុកភាពរបស់អ្នកដំណើរ និងសុវត្ថិភាពបុគ្គលិក ដោយកត់សម្គាល់ថា រថភ្លើងចាស់ៗមួយចំនួនរបស់ខ្លួន ខ្វះម៉ាស៊ីនត្រជាក់ និងងាយខូចដោយសារកម្ដៅ។

អាជ្ញាធរក៏បានព្រមានផងដែរថា កម្ដៅ​ក្ដៅខុសពីធម្មតាដែលជួបប្រទះក្នុងរយៈពេលប៉ុន្មានថ្ងៃថ្មីៗនេះ ត្រូវបានគេរំពឹងថា នឹងមាន​សភាព​កាន់តែខ្លាំងឡើង​ និងបន្តរហូតដល់យ៉ាងហោចណាស់ថ្ងៃអាទិត្យ។ សីតុណ្ហភាពនៅទូទាំងប្រទេសភាគច្រើន ត្រូវបានគេរំពឹងថា នឹងលើសពី ៣៥អង្សាសេ ចាប់ពីថ្ងៃពុធ ដោយសីតុណ្ហភាពក្ដៅ​បំផុតឡើងដល់ ៣៨អង្សាសេ នៅថ្ងៃសុក្រ៕