យានអវកាសគោចរក្នុងគន្លងតារាវិថីតម្លៃ ៥០០លានដុល្លាររបស់អង្គការណាសា ប្រឈមនឹងការឆេះ ពេលវាធ្លាក់ចូលក្នុងបរិយាកាសរបស់ផែនដីនាដំណាច់ឆ្នាំ ២០២៦នេះ ។

ទោះបីជាយ៉ាងណាក៏ដោយ ក្រុមហ៊ុនអវកាស Katalyst កំពុងព្យាយាមចុះបេសកកម្មសង្រ្គោះ ដើម្បីកុំឲ្យវាធ្លាក់ចូលក្នុងបរិយាកាសរបស់ផែនដី ។

លោក Ghonhee Lee គឺជាប្រធានប្រតិបត្តក្រុមហ៊ុន Katalyst Space Technologies ដែលបានរចនា ផលិត និងសាកល្បងយានអវកាសរូបយន្តដែលមានគោលបំណងសង្រ្គោះយានអវកាស Neil Gehrels Swift Observatory អាយុកាល ២២ឆ្នាំរបស់អង្គការណាសា ។ យានអវកាស Swift បានគោចរក្នុងគន្លងតារាវិថីចាប់តាំងពីឆ្នាំ ២០០៤រហូតមក ។

លោក Lee និយាយថា នេះមិនមែនជាឱកាសធានា ១០០ភាគរយថា ជាបេសកកម្មជោគជ័យនោះទេ ។ អ្នករាល់គ្នានៅអង្គការណាសា និងក្រុមហ៊ុន Katalyst ដឹងច្បាស់ថា យានអវកាស SWIFT កំពុងស្ថិតក្នុងហានិភ័យខ្ពស់បែបណា ។

លោកបន្តថា លោកសង្ឃឹមថានឹងអាចសហការណ៍ជាមួយទីបញ្ជាការអវកាសសហរដ្ឋអាមេរិក សម្រាប់ការធ្វើតេស្តបន្ថែមលើចលនាគន្លងគោចរ ប៉ុន្តែវាផ្អែកលើភាពជោគជ័យរបស់បេសកកម្មមួយគត់ ដើម្បីសង្រ្គោះយានអវកាស SWIFT ៕