តម្លៃប្រេងបាន ធ្លាក់ចុះកាលពីថ្ងៃពុធ ទី២៤ ខែមិថុនា ដល់កម្រិតទាបបំផុតចាប់តាំងពីការចាប់ផ្តើមសង្គ្រាមរវាងសហរដ្ឋអាមេរិក-អ៊ីរ៉ង់ ខណៈភាគហ៊ុនបច្ចេកវិទ្យាបន្តបង្ហាញពីភាពចុះខ្សោយនៅថ្ងៃដ៏ច្របូកច្របល់សម្រាប់ភាគហ៊ុនសកល។

តម្លៃប្រេងឆៅ Brent បានធ្លាក់ចុះក្រោម៧៥ដុល្លារអាមេរិកក្នុងមួយបារ៉ែលជាលើកដំបូងចាប់តាំងពីការចាប់ផ្តើមសង្គ្រាមតំបន់មជ្ឈិមបូព៌ានៅចុងខែកុម្ភៈ ខណៈនាវាដឹកប្រេងកាន់តែច្រើនបានវិលត្រឡប់ទៅកាន់ច្រកសមុទ្រ Hormuz បន្ទាប់ពីមានកិច្ចព្រមព្រៀងរវាងសហរដ្ឋអាមេរិក-អ៊ីរ៉ង់។ លោក Chris Beauchamp ប្រធានអ្នកវិភាគទីផ្សារនៅវេទិកាជួញដូរតាមអ៊ីនធឺណិត IG បាននិយាយថា ស្ថានភាពមិនជាក់លាក់នៅតែបន្តកើតមានចំពោះតម្លៃប្រេង។ លោកបាននិយាយបន្ថែមថា នេះក៏បានផ្តល់នូវភាពធូរស្រាលសម្រាប់អ្នកប្រើប្រាស់នៅជុំវិញពិភពលោក ដោយសន្មតថាឧស្សាហកម្មប្រេងអាចប្រញាប់ប្រញាល់ដើម្បីបំពេញចន្លោះប្រហោងដែលបន្សល់ទុកដោយការរំខានជាច្រើនខែមកនេះ។

កាលពីថ្ងៃពុធ ក្រុមហ៊ុនតាមដានផ្លូវសមុទ្រ ខេប្លឺ(Kpler) បានកត់ត្រាការដឹកជញ្ជូនទំនិញចំនួន២៦ជើងកាលពីថ្ងៃអង្គារ និង១៧ជើងកាលពីថ្ងៃពុធ។ នៅក្នុងពេលសន្តិភាព នាវាប្រហែល ១២០ គ្រឿងជាធម្មតាឆ្លងកាត់ច្រកសមុទ្រ Hormuz ជារៀងរាល់ថ្ងៃ ដោយដឹកជញ្ជូនប្រហែលមួយភាគប្រាំនៃការនាំចេញប្រេង និងឧស្ម័នធម្មជាតិរាវ (LNG) ទូទាំងពិភពលោក។

លោក Marco Rubio រដ្ឋមន្ត្រីការបរទេសសហរដ្ឋអាមេរិក បាននិយាយថា សហរដ្ឋអាមេរិក បានប្តេជ្ញារក្សាស្ថានភាពមុនពេលសង្គ្រាមនៃការធ្វើនាវាចរណ៍ដោយគ្មានការបង់ប្រាក់នៅក្នុងច្រកសមុទ្រ Hormuz ដែលដឹកជញ្ជូនប្រេង និងឧស្ម័នភាគច្រើនជាសកល។ ទោះជាយ៉ាងណា អ៊ីរ៉ង់បាននិយាយដដែលៗថា ខ្លួនមានបំណងរក្សាការគ្រប់គ្រងនៅច្រកសមុទ្រនេះ រួមជាមួយប្រទេសអូម៉ង់ និងឲ្យបង់ថ្លៃសេវានៅច្រកសមុទ្រសម្រាប់ការឆ្លងកាត់។