រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយកាលពីថ្ងៃពុធ ទី២៤ ខែមិថុនា ថា សហរដ្ឋអាមេរិក មិនបានទាមទារឲ្យអ៊ីស្រាអែលដកកងទ័ពរបស់ខ្លួនចេញពីភាគខាងត្បូងប្រទេសលីបង់ទេ វាជាលក្ខខណ្ឌត្រូវបានកំណត់ដោយប្រទេសលីបង់ក្នុងការចរចាបទឈប់បាញ់ដែលកំពុងដំណើរការ។

លោក Katz បាននិយាយនៅក្នុងបទសម្ភាសន៍មួយនៅពេលកិច្ចប្រជុំថ្នាក់ដឹកនាំតំបន់នៅទីក្រុង Tel Aviv ថា «យើងបានប្រកាសថា ក្នុងករណីណាក៏ដោយយើងមិនដកកងទ័ពចេញទេ នេះជាសមិទ្ធផលផ្នែកការទូត ហើយពុំមានការទាមទាររបស់សហរដ្ឋអាមេរិកឲ្យអ៊ីស្រាអែលដកកងទ័ពចេញពីប្រទេសលីបង់ទេ»។

លោក Katz បាននិយាយថា លោកបានប្រាប់រដ្ឋមន្ត្រីការពារជាតិសហរដ្ឋអាមេរិក លោក Pete Hegseth ហើយនាយករដ្ឋមន្ត្រីអ៊ីស្រាអែល លោក Benjamin Netanyahu បានប្រាប់ប្រធានាធិបតីសហរដ្ឋអាមេរិក លោក Donald Trump ថា «យើងនៅទីនោះ ដើម្បីការពារប្រជាជននៅភាគខាងជើង» ប្រទេសអ៊ីស្រាអែល។

នៅក្នុងសុន្ទរកថាក្នុងសន្និសីទមួយ លោក Netanyahu បានបញ្ជាក់ជាថ្មីថា យោធាអ៊ីស្រាអែល មិនត្រូវបានគេរំពឹងថានឹងដកថយទេ។ លោកនិយាយថា «ដរាបណាខ្ញុំនៅតែជានាយករដ្ឋមន្ត្រី យើងនឹងរក្សាតំបន់សន្តិសុខនៅភាគខាងត្បូងប្រទេសលីបង់ ហើយកងទ័ពរបស់យើងនៅពេលនោះកំពុងរុះរើហេដ្ឋារចនាសម្ព័ន្ធមូលដ្ឋានទាំងអស់របស់ក្រុមហេសបូឡា»។

ប្រធានាធិបតីលីបង់ លោក Joseph Aoun បានច្រានចោលការចូលកាន់កាប់នៅភាគខាងត្បូងរបស់អ៊ីស្រាអែល និងការជ្រៀតជ្រែកពីបរទេសក្នុងកិច្ចការប្រទេសរបស់លោក ជាការនិយាយសំដៅទៅលើអ៊ីរ៉ង់ដែលជាអ្នកគាំទ្រក្រុមហេសបូឡា ខណៈការចរចាជុំទីប្រាំរវាងអ៊ីស្រាអែលនិងលីបង់ បានចាប់ផ្តើមនៅទីក្រុងវ៉ាស៊ីនតោន កាលពីថ្ងៃអង្គារ។