មន្ត្រីមកពីក្រុមប្រឹក្សាសន្តិភាពគាំទ្រដោយសហរដ្ឋអាមេរិក បាននិយាយកាលពីថ្ងៃពុធ ទី២៤ ខែមិថុនាថាអ្នកតំណាងស្ថាប័នដែលមានភារកិច្ចគ្រប់គ្រង និងកសាងឡើងវិញក្រោយសង្គ្រាមនៅតំបន់ហ្កាហ្សា នឹងជួបប្រជុំគ្នានៅប្រទេសស៊ីបនៅសប្តាហ៍ក្រោយ ដោយប្រព័ន្ធផ្សព្វផ្សាយអ៊ីស្រាអែលពិពណ៌នាអំពីកិច្ចប្រជុំនេះថាជាឱកាសសម្រាប់ការកំណត់ឡើងវិញ។

អ្នកនាំពាក្យរដ្ឋាភិបាលប្រទេសស៊ីប លោក Constantinos Letymbiotis បាននិយាយថា កិច្ចប្រជុំនេះនឹងធ្វើឡើងនៅថ្ងៃអង្គារ និងថ្ងៃពុធ សប្តាហ៍ក្រោយ។

មន្ត្រីក្រុមប្រឹក្សាសន្តិភាពម្នាក់បានប្រាប់សារព័ត៌មាន AFP ថា ក្រុមប្រឹក្សា «បើកកិច្ចប្រជុំផ្ទៃក្នុងជាប្រចាំ ហើយកិច្ចប្រជុំដែលបានគ្រោងទុកនៅប្រទេសស៊ីបក៏មិនខុសគ្នាដែរ»។ លោកបាននិយាយបន្ថែមថា ក្រុមប្រឹក្សាកំពុងរៀបចំវិធានការយ៉ាងសកម្មដើម្បីជំរុញការកសាងឡើងវិញ និងអភិបាលកិច្ចសម្រាប់ប្រជាជននៅក្នុងតំបន់ហ្កាហ្សា។

កាសែត The Times of Israel បានរាយការណ៍ថា អ្នកតំណាងនៃស្ថាប័នផ្សេងៗដែលធ្វើប្រតិបត្តិការក្រោមក្របខ័ណ្ឌរបស់ក្រុមប្រឹក្សានឹងវាយតម្លៃឡើងវិញនូវយុទ្ធសាស្ត្ររបស់ខ្លួនបន្ទាប់ពីរយៈពេល៦ខែដំបូងដ៏លំបាក ដែលបង្កើតបានលទ្ធផលតិចតួច។ គេហទំព័រព័ត៌មានអ៊ីស្រាអែលបានដកស្រង់សម្តីអ្នកការទូតអារ៉ាប់ម្នាក់ និងមន្ត្រីប៉ាឡេស្ទីនម្នាក់ ដែលបានពិពណ៌នាអំពីការជួបប្រជុំនេះថាជាឱកាសមួយដើម្បី «កំណត់ និង កែសម្រួលឡើងវិញ»។ ក្រុមប្រឹក្សាសន្តិភាពត្រូវបានបង្កើតឡើងកាលពីដើមឆ្នាំនេះ ជាផ្នែកមួយនៃផែនការបទឈប់បាញ់គាំទ្រដោយសហរដ្ឋអាមេរិកសម្រាប់តំបន់ហ្កាហ្សាដែលគាំទ្រដោយក្រុមប្រឹក្សាសន្តិសុខអង្គការសហប្រជាជាតិ។ គំនិតផ្តួចផ្តើមនេះ មានគោលបំណងសម្រួលដល់ការផ្លាស់ប្តូរចេញពីការគ្រប់គ្រងរបស់ក្រុមហាម៉ាស ខណៈគាំទ្រដល់ការស្តារឡើងវិញនូវរដ្ឋបាលស៊ីវិល និងសេវាជាមូលដ្ឋាន។