អឺរ៉ុបខាងលិចបានស្ថិតក្រោមរលកកម្ដៅដ៏ក្រៅកាលពីថ្ងៃពុធ ២៤ មិថុនា សប្ដាហ៍នេះ ដែលបានឆក់យកជីវិតមនុស្សរាប់សិបនាក់ រំខានដល់ការផ្គត់ផ្គង់ថាមពល បិទសាលារៀន និងទីតាំងវប្បធម៌ ខណៈក្រុមអ្នកព្យាករណ៍បានព្រមានថា សីតុណ្ហភាពក្ដៅខ្លាំងអាចបន្តរហូតដល់ចុងសប្តាហ៍។

ដោយបានបំបែកកំណត់ត្រាកាលពីកន្លងទៅ ចក្រភពអង់គ្លេស បានកត់ត្រាសីតុណ្ហភាពខ្ពស់បំផុតរបស់ខ្លួនសម្រាប់ខែមិថុនា ដោយឡើងដល់៣៦,១ អង្សាសេ នៅភាគខាងត្បូងប្រទេសអង់គ្លេស ខណៈកម្ដៅបានគ្របដណ្ដប់លើភាគច្រើននៃទ្វីបអឺរ៉ុបខាងលិច។

សីតុណ្ហភាពនៅទីក្រុងប៉ារីសបានឡើងដល់កំណត់ត្រាខែមិថុនា៤០,៩ អង្សាសេ មួយថ្ងៃបន្ទាប់ពីប្រទេសបារាំងបានកត់ត្រាថ្ងៃក្តៅបំផុតរបស់ខ្លួនចាប់តាំងពីកំណត់ត្រាបានចាប់ផ្តើមជិត ៨០ឆ្នាំមុន នៅពេលសីតុណ្ហភាពក្ដៅបានឡើងដល់កម្រិត៤៤,៣ អង្សាសេនៅក្នុងទីក្រុង Pissos ភាគនិរតី។

ក្រសួងសុខាភិបាលអ៊ីតាលីបានដាក់ទីក្រុងចំនួន ១៦ រួមទាំងទីក្រុង Florence, Milan, Rome, Turin និង Verona ឲ្យស្ថិតក្នុងការប្រកាសអាសន្នកម្ដៅខ្ពស់បំផុតរបស់ខ្លួន ហើយបានព្រមានថា រលកកម្ដៅអាចនឹងកើនឡើងបន្ថែមទៀត ដល់កម្រិតខ្ពស់បំផុតរវាងថ្ងៃអាទិត្យ និងថ្ងៃចន្ទខាងមុខ។

ក្រុមអាជ្ញាធរបាននិយាយថា មនុស្សយ៉ាងហោចណាស់៤៨នាក់ បានស្លាប់នៅក្នុងប្រទេសបារាំងដោយសារលង់ទឹកចាប់តាំងពីការចាប់ផ្តើមនៃរលកកម្ដៅ ខណៈកំពុងព្យាយាមធ្វើឲ្យត្រជាក់ខ្លួន ហើយកុមារតូចៗពីរនាក់បានស្លាប់ដោយសារកម្ដៅនៅក្នុងរថយន្ត។

ប្រទេសអេស្ប៉ាញ បានរាយការណ៍ថា មនុស្សចាស់ពីរនាក់បានស្លាប់ដោយសារកម្ដៅខ្លាំង បន្ទាប់ពីសីតុណ្ហភាពលើសពី ៤០ អង្សាសេអស់រយៈពេលជាច្រើនថ្ងៃ ទោះបីជាស្ថានភាពនៅទីនោះបានចាប់ផ្តើមធូរស្រាលកាលពីថ្ងៃពុធសប្ដាហ៍នេះ បន្ទាប់ពីថ្ងៃដ៏ក្តៅបំផុតនៅចុងខែមិថុនាក៏ដោយ នេះបើយោងតាមទីភ្នាក់ងារអាកាសធាតុជាតិ AEMET៕