នាព្រឹក​ថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) នេះ ប្រធានាធិបតីស្តីទី លោកស្រី Delcy Rodriguez បានប្រាប់​ឲ្យ​ដឹង​ថា រញ្ជួយដីដ៏ខ្លាំងក្លាចំនួន ២លើក ដែលបានអង្រួន​​រដ្ឋធានីការ៉ាកាស និងតំបន់​ផ្សេងទៀតរបស់​​ប្រទេសវ៉េណេស៊ុយអេឡា កាលពីល្ងាចថ្ងៃពុធ បានឆក់​យក​​ជីវិត​មនុស្សយ៉ាងហោចណាស់ ៣២នាក់ ហើយ​​​ជាង ៧០​០នាក់រង​របួស​។​

ការរញ្ជួយដីដ៏ធំ​នេះ បានបណ្តាលឲ្យ​អគារនៅក្នុងរដ្ឋធានីដួលរលំ និងបង្ខំ​ឲ្យ​អាកាសយានដ្ឋានដ៏​សំខាន់របស់ប្រទេសត្រូវ​បិទ ខណៈ​ជំរុញឲ្យ​ប្រធានាធិបតីអាមេរិកលោក Donald Trump ប្រកាស​ផ្តល់ជំនួយ។​​

នៅក្នុងសុន្ទរកថាមួយទៅកាន់ប្រជាជាតិ លោកស្រី Rodriguez បានបញ្ជាក់​ថា៖ «នៅពេលនេះ យើងបានទទួលរបាយការណ៍អំពីអ្នក​ស្លាប់ចំនួន ៣២នាក់ ហើយ​ជាង ៧០០នាក់បាន​រង​របួស»។ លោកស្រី​បាន​បន្ថែមថា លោកស្រីមិនទាន់មានទិន្នន័យនៅឡើយ​ទេ អំពី «តំបន់ដែលរងគ្រោះខ្លាំងបំផុត» នៃ​ទី​ក្រុង La Guaira។

លោកស្រី Rodriguez ឲ្យដឹង​ទៀត​ថា រលក​រញ្ជួយ ឬការ​រញ្ជួយ​តូចៗបន្ថែមចំនួន ២០​លើក​ បានកើតឡើងបន្ទាប់ពី​មាន​រញ្ជួយដីកម្រិត ៧,២ និង ៧,៥រ៉ិចទ័រ ដែលបានវាយប្រហារតំបន់ដដែល​នៃប្រទេសវ៉េណេស៊ុយអេឡា។ នេះបើយោងតាមទីភ្នាក់​ងារ​ស្ទង់​ភូគព្ភសាស្ត្ររបស់​សហរដ្ឋអាមេរិក (USGS)។ យ៉ាង​ណាក្ដី លោកស្រីបានព្រមានថា ចំនួនអ្នកស្លាប់ត្រូវបានគេរំពឹងថា នឹងកើនឡើង ខណៈក្រុមជួយសង្គ្រោះ កំពុងរុករកតាម​អគារដែលដួលរលំ ហើយ​ក្រុមសង្គ្រោះបន្ទាន់បានទៅដល់តំបន់ដែលរងការខូចខាត។

ហើយ​បើ​យោង​តាម​ USGS ដោយ​ប្រើប្រាស់​គំរូ​ព្យាករណ៍​ ដើម្បី​ប៉ាន់ប្រមាណ​ចំនួន​អ្នកស្លាប់ ​បានឲ្យ​ដឹង​​ថា អាច​នឹង​​មានអ្នក​បាត់​បង់ជីវិត​​រាប់ពាន់នាក់ ដោយ​​ប្រូបាប៊ីលីតេ​លើស ១០.០០០នាក់។ បណ្ដាមេដឹកនាំ​ទូទាំង​ពិភពលោក បាន​បង្ហាញ​ការគាំទ្រ​ ចំពោះ​ប្រទេស​វ៉េណេហ្ស៊ុយ​អេឡា ក្រោយ​​មាន​គ្រោះ​រញ្ជួយដីដ៏ធំបំផុត និងខ្លាំងបំផុត ក្នុងរយៈពេលជាង ១២៥ឆ្នាំនេះ​៕